39 Бардыгы /

ОшМУда жаңы «Ала-Тоо» пародасындагы кыргыз койлорун өстүрүүдөгү актуалдуу көйгөйлөр боюнча эл аралык илимий-практикалык конференция жыйынтыкталды. Бул маанилүү иш-чарага президенттин Ош облусундагы ыйгарым укуктуу Өкүлчүлүгүнөн, Ош мэриясынан, Суу ресурстары, айыл чарба жана кайра иштетүү өнөр жайы министрлигинен өкүлдөр, кошуна өлкөлөрдөн келген окумуштуулар жана фермерлер дагы катышты. 

Аталган конференцияда Кыргызстанда жаңыдан чыгарылып жаткан койлордун «Ала-Тоо» пародасын элге таанытып, андан ары өндүрүшкө кеңири жайылтуу маселеси кабыргасынан коюлду. Мындан тышкары селекциялык асыл тукум иштерин жогорку деңгээлге чыгарууга басым жасоо, заманбап технологияларды колдонуу менен жаңы чыгарылган койлордун кунардуулугун жогорулатуу боюнча сын-сунуштар дагы айтылды. Болочокто «Ала-Тоо» пародасындагы кыргыз койлорунун асыл тукум фермаларын жана заводдорун уюштуруу керектиги деле баса белгиленди.

Ошентип, жогорудагы илимий иш-чаранын алкагында ОшМУнун Табият таануу, дене тарбия, туризм жана агрардык технологиялар институтундагы Ветеринардык клиниканын короосуна «Ала-Тоо»  пародасындагы койдун скульптурасы дагы орнотулду. Буга дейре ОшМУда аталган пародадагы койлордун жаңы тукуму ар тарптуу изилденген.

Алишер ТОКСОНБАЕВ, өз кабарчы