36 Бардыгы /

        Баткен облусунун борбору Баткен шаарында Чернобыль апаатынын 39 жылдыгына карата эскерүү иш-чарасы өткөрүлүп, анда кырсыктан каза тапкандарга багышталып куран дагы окулду.

Аталган иш-чарага президенттин Баткен облусундагы Өкүлүнүн орун басары Жаныбек Исаков баштаган жергиликтүү жетекчилер, Чернобыль апаатынын катышуучулары, кырсык маалында каза тапкандардын үй-бүлөлөрү жана Баткен шаарынын тургундары катышышты. Айтмакчы, Чернобыль АЭСиндеги (атомдук электр станциясындагы) авариянын кесепеттерин жоюуга Баткен облусунан жалпы жонунан 146 жаран катышкан. Бүгүнкү күндө булардын облус аймагында 85и гана жашап жатышат.

Ошентип, эскерүү иш-чарасына катышкан жергиликтүү жетекчилер Чернобыль АЭСиндеги трагедиялуу окуя жаатында өзүнчө сөз сүйлөшүп, каза тапкан жарандардын элеси түбөлүккө сакталып, ал эми арабыздагы катышуучулары ар тараптан камкордукка алынаарын дагы катуу убада кылышты. Соңунда Чернобыль апаатында курман болгондорго багышталып куран дагы окулду. Ушуга улай Чернобыль атомдук электр станциясындагы авариядагы жарылуунун кесепетин жоюудагы эрдиктери үчүн бир катар катышуучуларга сыйлыктар дагы тапшырылды.

Ушундай эле эскерүү иш-чаралары Ош шаарында жана дагы Ош облусунун бардык калааларында дагы өткөрүлдү.

Эске салчуу жагдай: 1986-жылдын 26-апрелинде Чернобыль атомдук электр станциясынын эки блогу катарынан эки ирет жарылып, чоң кыйроого учураган. Кырсыктын кесепеттерин жоюуга ошогездеги СССРдин бардык союздук республикаларынын (мунун ичинде Кыргызстандын) дагы кырчындай жигиттери активдүү аралашкан.

Алишер ТОКСОНБАЕВ, өз кабарчы