54 Бардыгы /

Кыргызстандын Баткен облусунун аймагында ишмердүүлүгүн жүргүзүп жатышкан жалпыга маалымдоо каражаттарынын өкүлдөрү Өзбекстандын Фергана облусунун маалымат каражаттарынын өкүлдөрү менен Фергана шаарында жолугушту. Алар Фергана облусундагы телекөрсөтүү, гезит жана үналгылардын ишмердүүлүгү менен жеринде кенен-чонон таанышып, андан ары журналисттер өз ара тажрыйба дагы алмашышты.

Ошентип, УТРКнын Баткен телеканалы менен Өзбекстандын Фергана облусунун Рухсор телерадиокомпаниясынын ортосунда кызматташуу боюнча меморандумга кол коюлду. Тараптар Кыргыз-Өзбек элинин кылым карыткан кошуналык жакын мамилесин, достугун мындан ары чыңдоо жана Баткен-Фергана облустарынын ар тараптуу кызматташтыгын ого бетер бекемдөөгө багытталган, биргелешкен материалдарды даярдоо боюнча дагы макулдашышты. Ошондой эле журналисттер Фергана облусундагы тарыхый жана туристтик обьекттерди тегиз кыдырышып, туристтер үчүн түзүлгөн шарттарды дагы жеринде көрүштү.

Белгилей кетчүү жагдай: буга дейре Кыргыз Республикасынын Президенти Садыр Жапаров менен Өзбекстан Республикасынын Президенти Шавкат Мирзиеевдин эки тараптуу кызматташтыкты жогорку деңгээлге алып чыгуу боюнча кол койгон документтерге ылайык, Кыргыз Республикасынын Президентинин Баткен облусундагы ыйгарым укуктуу өкүлүнүн аппараты менен Өзбек Республикасынын Фергана облусунун хокимиятынын ортосунда кызматташууну кеңейтүү жөнүндө комплекстүү программага («Жол Картасы») кол коюлган. Ушуга ылайык бул сапар Кыргыз Республикасынын Президентинин Баткен облусундагы ыйгарым укуктуу өкүлү Айбек Шаменовдун тапшырмасына ылайык, жалпыга маалымдоо каражаттары аркылуу кошуна элдердин карым-катышын мындан ары өнүктүрүү максатында гана уюштурулду.

Алишер ТОКСОНБАЕВ, өз кабарчы