24 Бардыгы /

Кечээ,  Жалал-Абад облусунда 2025-жылдын төрт ай аралыгында төрөт мезгилиндеги энелердин ден соолугуна кам көрүү, ымыркайлардын өлүмүнүн алдын алуу маселелерин караган координациялык комиссиянын отуруму өттү.

Отурумга Кыргыз Республикасынын Президентинин Жалал-Абад облусундагы ыйгарым укуктуу өкүлүнүн орун басары Урматбек Самаев, район, шаар башчыларынын социалдык маселелер боюнча орун басарлары, координациялык комиссиянын мүчөлөрү, облус аймагындагы Жалпы дарыгерлер практикалык жана санитардык-эпидемиологиялык көзөмөлдөө борборлорунун жетекчилери катышты.

Жыйындын жүрүшүндө Жалал-Абад облусунда 2025-жылдын төрт ай аралыгында жалпы 7 миң 921 төрөт катталганы, бул көрсөткүч 2024-жылга салыштырмалуу 466га аз болгону белгиленди. Төрт ай аралыгында облустун Тогуз-Торо жана Ноокен районунда, Кочкор-Ата шаарларында бирден эненин өлүмү катталган. Аймакта өткөн жылга салыштырмалуу бир жашка чейинки ымыркайлардын өлүмү 26 бала азайган.

Облус башчысынын орун басары Урматбек Самаев, калктын саламаттыгын сактоо, анын ичинде төрөт жашындагы аялдардын ден соолугуна кам көрүү, алардын маалымдуулугун жогорулатуу жана өз убагында кароодон өткөрүү маселесинде дарыгерлердин жоопкерчилигин эскертти.

Ошол эле учурда, жергиликтүү бийлик жетекчилерине төрөт үйлөрү жана балдар жандандыруу бөлүмдөрүнө керектүү шарттарды түзүү, саламаттык сактоо мекемелерине жетишпеген дарыгерлерди камсыздоо жана аларга кошумча социалдык жеңилдиктерди түүзү иштерин колго алууну тапшырды.