18 Бардыгы /

Кыргыз Республикасынын Президентинин Ишкерлердин укуктарын коргоо боюнча, 2025-2030-жылдарга Кыргыз Республикасында коррупцияга каршы аракеттенүү боюнча мамлекеттик стратегиясын жана 2030-жылга чейинки Улуттук өнүктүрүү программасын ишке ашыруу жөнүндө жарлыктарынын алкагында Башкы прокуратуранын алдындагы Ишкерлердин жана инвесторлордун укуктарын коргоо боюнча консультативдик кеңешинин жыйыны өттү.

КРдин Башкы прокуратурасынын маалымат кызматы билдиргендей, жыйынга Башкы прокурордун биринчи орун басары Б.Т. Маатов төрагалык кылды. Анда ишкерлер менен инвесторлордун ишине тоскоол болгон маселелер жана көзөмөл органдарынын негизсиз кийлигишүүсүнөн укуктук коргоону күчөтүү боюнча чаралар талкууланды.

Иш-чаранын жүрүшүндө Кыргыз Республикасынын Президентине караштуу Улуттук инвестициялар агенттиги үчүн жаңыдан иштелип чыккан инвесторлордун арыздарын кароо жана аларга коштоочу колдоо көрсөтүү системасы тааныштырылды. Ошондой эле Экономика жана коммерция министрлиги Башкы прокуратура менен биргеликте түзгөн жана текшерүүлөрдү каттоону автоматташтырууга багытталган proverka.gov.kg санариптик платформасынын жаңыланган форматы көрсөтүлдү. Прокуратура тарабынан «Бизнес коргоо» мобилдик тиркемеси да сунушталды.

Кеңештин ишине Кыргыз Республикасынын Президентинин Администрациянын, мамлекеттик органдардын, бизнес-ассоциациялардын, соода-өнөр жай палатасынын жана эл аралык өнөктөштөрдүн өкүлдөрү катышты.

Жыйынтыгында ишкерлер үчүн ыңгайлуу шарттарды түзүү жана инвестициялык климатты жакшыртуу боюнча биргелешкен чечимдер кабыл алынды.

Мындан тышкары, Башкы прокурордун буйругуна ылайык ушундай эле консультативдик кеңештер аймактык прокуратураларда да иштеп, ишкерлердин маселелерин жеринде чечүүгө мүмкүнчүлүк берүүдө.