18 Бардыгы /

Бүгүн, 29-август күнү Кыргыз Республикасынын Эгемендүүлүк майрамын утурлай Жалал-Абад шаарындагы №1 үй-бүлөлүк дарыгерлер тобунун 3 кабаттуу жаңы имараты пайдаланууга берилди.

Имаратты Президент Садыр Жапаровдун онлайн катышуусунда, Жалал-Абад шаарынын мэри Эрнисбек Ормоков ачып, имарат менен таанышты.

Белгилей кетсек, Кыргыз Республикасынын эгемендүүлүгүнүн 34 жылдыгын утурлай, 29-августта өлкөдө 100дөн ашык социалдык объект Президент Садыр Жапаровдун онлайн катышуусунда бир учурда ачылып, пайдаланууга берилди. Алардын арасында Жалал-Абад шаарындагы 4 объект бар. Атап айтсак, №1 үй-бүлөлүк дарыгерлер тобунун имараты, Жалал-Абад облустук төрөт үйүнүн перинаталдык борборунун имараты, “Скай” эл аралык мектеби, №24 «Сейил» мектепке чейинки билим берүү уюму.

Жалал-Абад облустук төрөт үйүнүн 75 орундуу кошумча имараты ачылды. Пайдаланууга берилген 3 кабаттуу имаратта 2 операциялык блок бар. Мында көз жарган энелер үчүн санитардык нормалардын баары сакталган. Балдарды күчтөндүргөн таризде дарылоо блогу, энелер үчүн 2 реанимациялык блок бар. Ар бир палата 2 же 3 энеге гана ылайыкташкан. Курулуш республикалык бюджеттен каржыланып, 220 миллион сом жумшалды.

Жалал-Абад шаарынын Көк-Арт аймактык башкаруусундагы ачылган №24 “Сейил” мектепке чейинки билим берүү уюму 75 орунга ылайыкташып, балдар үчүн бардык заманбап шарттар каралган. Бала бакчанын курулушу республикалык бюджеттен бүткөрүлдү.

Ал эми “Скай” эл аралык мектеби Кембридж программасы менен билим берип, окутуу англис тилинде жүргүзүлөт. 670 орунга ылайыкташкан окуу жайда бардык шарттар каралган. Аталган “Скай” эл аралык мектебин курууга Жалал-Абад шаарынын мэриясы 1,15 гектар муниципалдык жер аянтын ажыратып берген.