3 Бардыгы /

Бүгүн, 19-сентябрда Кыргыз Республикасынын Улуттук коопсуздук мамлекеттик комитетинин Жалал-Абад облусу боюнча башкы башкармалыгы жана Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын демилгеси менен билим берүү тармагынын кызматкерлерине жыйын өткөрүлдү.

Иш-чарага Кыргыз Республикасынын Президентинин облусундагы ыйгарым укуктуу өкүлүнүн орун басары Урмат Самаев, Улуттук коопсуздук мамлекеттик комитетинин Жалал-Абад облусу боюнча башкы башкармалыгынын орун басары Эрлан Чоробеков, райондук мамлекеттик администрациялардын социалдык маселелер боюнча орун басарлары, шаар мэрлеринин орун басарлары, райондук жана шаардык билим берүү бөлүмдөрүнүн жетекчилери, мектеп директорлору катышты.

Жыйында үч негизги маселе талкууланды. Алар билим берүү тармагындагы коррупциялык элементтер жана мыйзам бузуулар, жаңы окуу жылына карата мектептердин даярдыгы жана жашы жете электер арасындагы кылмыштуулуктун алдын алуу маселелери.

Иш чаранын жүрүшүндө Э.Чоробеков тарабынан мектептердеги коррупциялык элементтердин улануусу жана башка мыйзам бузуулар белгиленип, азыркы күндөгү мыйзамдын жана өлкө жетекчилеринин талабынын негизинде аёсуз оор чаралар көрөлөрү эскертилди. Ошондой эле жакынкы арада облус боюнча жүргүзүлүп жаткан иш-чаранын негизинде 5 мектеп директору кызматтан бошотулуп, 3 директор уй камагына чыкканын белгиледи.

Иш-чарада мамлекет тарабынан билим берүү тармагын өнүктүрүүгө өзгөчө көңүл бурулуп жатканы, жаңы мектептердин жана бала бакчалардын имараттары курулуп, мугалимдердин иштөөсү үчүн шарттар түзүлүп жатканы белгиленди. Ошол эле учурда түзүлүп жаткан шарттарга карабай, билим берүү тармагында коррупциялык көрүнүштөрдүн орун алып жатканы тууралуу да айтылды.

Облус башчысынын орун басары Урмат Самаев жергиликтүү бийлик өкүлдөрүнө, райондук жана шаардык билим берүү бөлүмдөрүнүн жетекчилерине жана мектеп директорлоруна кайрылып, коррупциялык көрүнүштөрдүн алдын алуу боюнча эскертүү берип, бул багытта чараларды күчөтүү зарылдыгын белгиледи.

Мындан сырткары, жаш өспүрүмдөрдүн арасындагы кылмыштуулукту жана суициддин алдын алуу боюнча түшүндүрүү иштерин жандандыруу милдети коюлду.