9 Бардыгы /

Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Чаткал районунун тургундары менен жолугушуп, алардын суроо-талаптарын жана көйгөйлөрүн укту. Жыйынга жалпы 300дөн ашуун тургун катышты.

Жолугушууда облус башчысы алыскы Чаткал районунда аткарылып жаткан ири долбоорлор жана алдыдагы пландар тууралуу маалымат берди.

Тургундар өз кезегинде бир катар көйгөйлөрдү көтөрүштү. Атап айтканда, Каныш-Кыя айыл аймагынын Айгыр-Жал айылына түнкү жарыктандыруу орнотуу, Курулуш жана Ак-Таш айылдарында таза суу маселесин чечүү, Чаткал районундагы жаңы конуштарга орнотулган электр көмөк чордондорун “Электр тармактары” ишканасынын балансына алуу, Талас облусу менен жаралып келген жайыт маселесин чечүү, Чачыранды түрдө алтын казууга берилген лицензияларды жокко чыгаруу маселелери көтөрүлдү.

Ыйгарым укуктуу өкүл Тилек Текебаев ар бир маселе боюнча тиешелүү облустук мекеме-ишканалардын жетекчилеринен маалымат алып, көйгөйлөрдүн азыркы абалы жана аларды чечүү жолдору тууралуу түшүндүрмө берди. Ошондой эле ал жергиликтүү маанидеги маселелерди ыкчам чечүүнүн маанилүүлүгүн белгилеп, көтөрүлгөн бардык маселелер боюнча тиешелүү иштер колго алынаарын кошумчалады.