18 Бардыгы /

Бүгүн, 23-сентябрда К.Ш. Токтомаматов атындагы Эл аралык университеттин (ЭАУ, Жалал-Абад шаары) жыйындар залында Кыргыз Республикасынын Мамлекеттик тил күнү “Манас тили – кыргыз тили!” аттуу майрамдык иш-чара менен салтанаттуу түрдө белгиленди.

ЭАУнун Кесиптик багыт берүү & коомчулук менен байланыштар кызматы билдиргендей, аталган иш-чараны университеттин мамлекеттик, расмий жана чет тилдер кафедрасы (кафедра башчысы фил.и.к., ЭАУ профессору К.У. Пайзуллаева), Маданий-эстетикалык борбору (директору М.А. Гайымов) жана чыгармачыл студенттердин тобу уюштурушту. Коомчулукка белгилүү болгондой, бул жылы кыргыз тилинин мамлекеттик тил макамына ээ болгондугуна 36 жыл толду. Бүгүнкү күндө кыргыз тили Кыргызстандын бардык аймактарында жана бардык тармактарында иштиктүү кодонулууда. Мамлекеттик тил күнүнө арналган иш-чаранын программасы боюнча даректүү видео тасмалар, улуттук ырлар жана бийлер, “Манас” дастанынан үзүндүлөр, кыргыз акын-жазуучуларынын чыгармаларынан көркөм окуулар, сахналаштыруулар профессор-окутуучулар курамынын жана студенттердин назарына тартууланды. Чакырылган меймандар тизмесинде Жалал-Абад шаарынын вице-мэри Гүлбарчын Таштанбекова, Ички иштер министрлигинин Ички аскерлеринин 7704 аскердик бөлүгүнүн офицерлери жана жоокерлери болушту.

Жалпысынан майрамдык иш-чара университеттин мыкты салттарында өткөрүлүп, меймандардын, агай-эжекелердин жана студенттердин купулуна толду. Университеттин ректору э.и.д., профессор Айжамал Кантөрөева куттуктоолору менен бирге майрамдык иш-чараны уюштургандарга, иш-чаранын өткөрүлүшүнө Барпы Алыкулов атындагы Жалал-Абад областтык драма театры сахналык кийимдер, реквизиттер менен жардам бергендерге чоң рахматын айтып, көмөк кылгандарга терең ыраазычылык билдирди.