3 Бардыгы /

Кечээ, 9-октябрда К.Ш. Токтомаматов атындагы Эл аралык университетте студенттер үчүн “Зордук-зомбулук, топтошкон мушташ, талап-тоноо жана никегеге эрте туруу боюнча мыйзам бузуулардын алдын алуу” аттуу лекция милиция кызматкерлери, университеттин юристтери тарабынан өткөрүлдү.

ЭАУнун Кесиптик багыт берүү & коомчулук менен байланыштар кызматы билдиргендей, К.Ш. Токтомаматов атындагы Эл аралык университеттин (ЭАУ, Манас шаары) жыйындар залында студенттер үчүн “Зордук-зомбулук, топтошкон мушташ, талап-тоноо жана никегеге эрте туруу боюнча мыйзам бузуулардын алдын алуу” аттуу лекция Жалал-Абад областынын Ички иштер башкармалыгынын коомдук коопсуздук кызматы (улук тескөөчү, милициянын майору Ы.А. Закиров), юриспруденция кафедрасы (башчысы ю.и.к., ЭАУ проф. К.К. Юлдашев), Манас шаарынын Ички иштер бөлүмүнүң Спутник кичи району боюнча аймактык бөлүмчөсү (аймактык ыйгарым укуктуу өкүлү,  милициянын улук лейтенанты Б.М. Акылбеков) тарабынан өткөрүлдү. Аталган лекцияга, лекциянын темасы алкагында түшүндүрүү иштерине милициянын бир катар кызматкерлери, юриспруденция кафедрасынын профессор-окутуучулар курамы да катышышты. Лекция абдан мазмундуу болуп, бир катар видео-фото материалдар менен коштолду. Студенттер лекция мыйзам бузуулардын алдын алуу маселелеринде, укуктук тарбия маселелеринде абдан пайдалуу экенин өз пикирлеринде белгилеп кетишти. Иш-чаранын соңунда ЭАУ ректору, э.и.д., проф. Айжамал Кантөрөева милиция кызматкерлерине лекцияны сапаттуу уюштуруудагы салымы, окуу жай менен жигердүү кызматташуусу үчүн терең ыраазычылык билдирди. ЭАУнун тарбия иштери боюнча проректору, фил.и.к., ЭАУ проф. Анвар Жолдошбаевдин айтуусу боюнча К.Ш. Токтомаматов атындагы Эл аралык университет мыйзам бузуулардын алдын алуу, жаштарга укуктук таалим-тарбия берүү багытында милиция, прокуратура, сот сыяктуу укук коргоо органдары менен тыгыз кызматташтык мамилелерде болуп, жыл сайын максатуу иш-чараларды алар менен бирге мерчемдик тартипте өткөрүп келет.