12 Бардыгы /

Жалал-Абадда Жогорку Кеңештин депутаттарын мөөнөтүнөн мурда шайлоону уюштуруу боюнча облустук штабдын отуруму өттү

Отурумду Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Нурлан Эрматов жетектеп, 2025-жылдын 30-ноябрында өтө турган шайлоого карата облустук деңгээлдеги даярдык иштеринин жүрүшүн талкууланды.

Белгилүү болгондой, Кыргыз Республикасынын Президентинин №272 Жарлыгынын негизинде Жогорку Кеңештин депутаттарын шайлоо ушул жылдын 30-ноябрына дайындалган. Аталган Жарлыкты ишке ашыруу максатында ыйгарым укуктуу өкүлдүн аппараты тарабынан облустук штаб түзүлүп, жумушчу топтун курамы жана район, шаарларга жооптуу кураторлору бекитилген.

Отурумдун жүрүшүндө шайлоону уюшкандыкта өткөрүү максатында тиешелүү мекемелерге бир катар тапшырмалар берилди. Анын ичинде коомдук коопсуздукту камсыздоо, шайлоо участкаларында өрт коопсуздугун камсыз кылуу, шайлоо күндөрү үзгүлтүксүз электр энергиясы жана интернет байланышын камсыздоо, ошондой эле тез жардам кызматтарын даяр кармоо милдеттери белгиленди.

Мындан тышкары, жергиликтүү бийлик жетекчилерине шайлоо комиссияларын материалдык-техникалык каражаттар менен камсыз кылуу, шайлоочулардын тизмесин тактоо, шайлоо участкаларында альтернативдик электр энергиясын жана жылытуу жабдууларын даярдоо, мүмкүнчүлүгү чектелген жарандар үчүн шарттарды түзүү зарылдыгы баса белгиленди.

Жыйында Нурлан Эрматов бардык жетекчилерди мыйзам талаптарын так сактоого, шайлоо процесси учурунда мыйзам бузууларга жол бербөөгө чакырып, берилген тапшырмалар көзөмөлдө болорун эскертти.