24 Бардыгы /

Облус башчысынын тапшырмасы менен Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Нурлан Эрматовдун жетекчилиги алдында Көк-Арт жана Кара-Дарыя сайынан инерттик материалдарды казууну токтотуу жана альтернативдик карьерлерди ачуу маселеси боюнча кеңешме өттү.

Жыйынга облустук комиссиянын мүчөлөрү, жергиликтүү бийлик өкүлдөрү жана ишкерлер катышты.

Көк-Арт дарыясынан көп жылдар бою мыйзамсыз кум-шагыл казуу дарыянын нугу 2–8 метрге чейин тереңдеп кетишине алып келип, 2547 турак жайга жана 898 гектар айыл чарба жерлерине кооптуулук жараткан. Экологиялык талаптарды бузган ишкерлерге 526 миң сом айып салынып, 2024–2025-жылдары дарыянын айрым тилкелеринде кум-шагыл казууга убактылуу тыюу салынган.

Жыйында Көк-Арт жана Кара-Дарыя сайларындагы рекультивация иштеринин жүрүшү, мыйзамсыз казууну токтотуу, рейддерди системалаштыруу жана мамлекеттик ири долбоорлор үчүн альтернативдик карьерлерди табуу маселелери каралды.

Кеңешменин жыйынтыгында бардык ишкерлер өз участокторун 20-февралга чейин рекультивациялоого милдеттендирилди. Укук коргоо, экология жана жергиликтүү бийлик органдары биргликте график түзүп, күнү-түнү рейддерди уюштурат жана мыйзам бузган техникалар айып короого киргизилет.

Көк-Арт жана Кара-Дарыя жээктеринде жайгашкан АБЗ, дробилка жана башка мыйзамсыз объекттер инвентаризацияланып, мыйзамсыз иштегендердин электр энергиясы өчүрүлөт.

Жыйында облус башчысынын биринчи орун басары Нурлан Эрматов сел жана суу ташкын коркунучун азайтуу, калктуу конуштарды коргоо жана мыйзамдуулукту камсыз кылуу артыкчылыктуу милдет экенин белгилеп, берилген тапшырмалардын так аткарылышы көзөмөлдөнөөрүн кошумчалады.