48 Бардыгы /

Бүгүн, 11-февралда Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Кыргыз Республикасынын Өзгөчө кырдаалдар министрлигинин облустук башкармалыгына жаңы техника жана атайын жабдыктарды тапшырды.

Облус башчысы өз сөзүндө куткаруучуларды куттуктап, бул демилге аймактагы коопсуздукту камсыз кылуу багытындагы маанилүү кадам экенин белгиледи. Ошондой эле ал табигый жана техногендик кырсыктарды жоюу, авариялык-куткаруу иштерин ыкчам жүргүзүү үчүн зарыл болгон заманбап техникалар жана жабдыктар сатып алынганын кошумчалады.

Белгилей кетсек, жаңы алынган техникалар Жалал-Абад облустук өнүктүрүү фондунун эсебинен каржыланып, жалпысынан 12 миллион 800 миң сом акча каражаты жумшалган.

Аталган каражатка үч даана JAC T6 үлгүсүндөгү автоунаа, мотопомпалар, куткаруу инструменттеринин комплекттери, дрон, жарык мунарасы, өрт өчүрүүчү жана куткаруу жабдыктары, ошондой эле суудагы куткаруу каражаттары сатылып алынган.