ЖАЗДЫН БИР КҮНҮ ЖЫЛ АЗЫГЫН БЕРЕТ

1,541 Бардыгы /

ЖАЛАЛ-АБАД. Жаздын бир күнү жыл азыгын берет деген элибиздин аталардан калган нускалуу сөзүн жетекчиликке алган Ала-Бука районунун дыйкандары жазгы талаа иштерин кызуу жүргүзүп жаткан учур.

Күздө Ала-Бука районундагы дыйкандар 2886 гектар аянтка күздүк дан эгиндерин себишкен, учурда бул аянттагы эгинди минералдык жер семирткичтер менен кошумча азыктандырууну аякташты. Район боюнча 13195 гектар аянтка жаздык эгин себиле турган болсо, учурда жер айдоо иштери кызуу жүрүүдө. Быйыл 345 гектар аянтка жаздык кылкандуу дан эгин себилип аяктоодо. Андан сырткары 574 гектар жерге картошканын үрөнүн себүү башталды. Ошол эле учурда 120 гектар аянтка жашылча өстүрүлмөкчү. Дыйкандар бул иштер менен бир катарда эле ички арыктарды чабуу, каналдарды тазалоо иштерин жүргүзүүдө. Тактап айтканда 149 километр ички арыктар чабылып тазаланып, эгин талааларына суугат суу берүүгө даяр. Бул иштерди уюштурууда райондун акими Эмилбек Абдыкадыров, айыл чарба департаментинин башчысы Абдымонон Ибрагимов тынымсыз аракеттин үстүндө болуп дыйкандардын жеңилин жерден, оорун колдон алышып уюштуруу жана көмөктөшүү иштери менен алек. Ошол эле учурда коронавиурстан дыйкандарды сактоо, алдын алуу иштери да унутта калбай күндүн башкы урааны болууда. Күнү -түнү элге түшүндүрүү иштери жүргүзүлүп жатат. Чамдай бериңиздер балбан билек дыйкандар, анткени учурдагы ар аракетиңиздер эртеңки берекелүү дасторконуңуздар болмокчу. Элибизге жараткан өзү жар болуп, жугуштуу ооруу сыркоолордон алыс болуп, ар бир күнүңүздөр жемиштүү жана жеңиштүү боло берсин. Райондогу жазгы талаа иштерин көрүп көңүл кубанып келечекте ишенимдүү кароого дем берет.