1,990 Бардыгы /

ЖАЛАЛ-АБАД. Ала-Бука районундагы дыйкандар жылдын башында келип элди түйшөлтүп жаткан таажывирусунун каатчылыгына карабай калк камын көрүп, талыкшыбай эки эселенген кайрат менен иштеп жатышкан учуру.

Ала-Бука районунун алыскы Көк-Таш айыл аймагынын дыйкандары быйылкы жылда 100 гектар аянтка картошка өстүрүүнү пландаштырган болсо учурда Көк-Таш айылында 12 гектар,ал эми Купбек-Сай айылында 13 гектар аянттагы картошка биринчи чабыктан чыгарылып, алгачкы кошумча азыктандыруудан чыгарылды. Мындан эмгектенип жатышкан дыйкандар Салманбек Каримов менен Асылбек Айтиев ишти өз убагында уюштуруп айдап сээп калууга жардам берген айыл өкмөтүнө жана райондук администрация менен айыл чарба департаментинин адистерине терең ыраазычылык билдиришет. Дыйкандарды колдоо менен эле чектелип калбастан элдин эсин эки кылып жаткан коронавирустун алдын алууда чоң жардам берип жаткандыгын белгилешүүдө. Талаага баруучу жолдорго чейин дезинфекциялап, бет каптар менен турмуш шарты оор үй бүлөдөгү азык -түлүк менен камсыз кылып, эл үчүн камкордук көрүп жатышкандыктарга ыраазыбыз дейт алар. Өзгөчө депутатыбыз Азизбек Турсунбаевге, райондун ишкер жаштарына, жеке ишкерлерге терең ыраазы. Эл уулдарынын камкордугуна жооп кылып кудай буйруса калк дасторконуна жаңы түшүмдүн алгачкы тонналарын  май айынын башында жөнөтөбүз деген изги тилек менен иштеп жатышат. Ынтымак болсок элге келген бул апаатан тез эле кутулабыз дейт дыйкандар. Эң башкысы эмгек талаасында да тартипти бекем сактап өкмөт менен президентибиздин аракеттерин колдоого алууга чакырат.  Дыйкандын талаасын карап туруп көз кубанып, жакшы тилектерди тиледик. Элибизге жараткан тынччылык, кут береке берсин демекчибиз.

Абдымомун КАЛБАЕВ, журналист, Ала -Бука району