“Оштогу инфекциялык ооруканада дарыгерлер илдетке чалдыкканы тууралуу маалыматтар чыкты. Бул окуя боюнча саламаттыкты сактоо министрлиги комиссия түздү. Иликтөө жүрүп жатат. Бүткөндө кошумча маалымдайбыз”

Бир күн мурда Ош шаардык клиникалык ооруканасынын балдардын жугуштуу оорулар ооруканасынын коронавирус илдетине кабылган кызматкерлери өкмөткө кайрылышкан. Кайрылууда кызматкерлер өздөрүнүн жетекчилиги, Ош шаардык эпидемиологиялык кызматы маалыматты штабга бурмалап жеткирип жатышат деп, ал үчүн оорукананын башчысы Кайрат Абжаловду күнөөлөшкөн.

Кайрылууда «биздин дарыгер эч кандай кошунасыныкына кирип, чай ичкен эмес… Умрадан келген жарандар менен кошо жүрүп, ишин аткарган. Имаратта «кооптуу зона» бөлүнбөгөнүн башкы врачка маалымдаганбыз» деп жазылган. Кайрылууда Кайрат Абжаловду Аматова аттуу дарыгерге жалаа жаап жатканына мисалдар келтирилген:

Биринчи вице-премьер-министр Кубатбек Боронов 8-апрелдеги онлайн брифингде:

“Айрым медициналык кызматкерлер ооруну иш үстүндө эмес, сырттан жуктургандары да аныкталып жатат. Оштогу инфекциялык ооруканада иштеген бир врач Умрага барып келген кошунасынын чайына барып, ошол жактан жуктуруп алганы такталып жатат. Ал өзү билбей жүрө берип, кесиптештерине да жуктурганы боюнча министрлик маалымат берди “, – деп билдирген.

Ош шаардык жугуштуу оорулар ооруканасынын 20 дарыгери кол койгон кайрылуусу 8-апрелде социалдык тармактар аркылуу таратылып, кызуу талкууланып жатат.

9-апрелде Ош облусундагы медкызматкерлердин ооруну топ-тобу менен жуктуруп алуу учурларын иликтөө үчүн Ош шаарына инфекциялык көзөмөлдүн адистери жөнөп кетти. Бул тууралуу Коронавирустун жайылуусунун алдын алуу боюнча республикалык штаб билдирди. Маалыматка караганда ооруканадагы коронавирус жугузган ар бир медицина кызматкеринин жагдайы өз-өзүнчө дыкат териштирилип, тиешелүү баа берилет.

9-апрелге карата өлкө боюнча саламаттык сактоонун 34 кызматкери коронавируска чалдыккан, алардын катарында дарыгерлер, медайымдар, инфекционисттер, лаборанттар, эпидемиологдор, ашкананын жумушчулары жана кир жуугучтар бар.

WWW.