2,115 Бардыгы /

ЖАЛАЛ-АБАД. Жазгы суу ташкындарынын алдын алуу максатында Жалал-Абад шаарындагы Сел-Арык, Чөкө-Арык жана Хан-Арык каналдары тазаланууда. Бул тууралуу шаардык мэриянын маалымат кызматы маалымдады.

Жалал-Абад шаарында сел ташкындарын алдын алуу аракети боюнча бул багытта калаа казынасынан атайын акча каражаты бөлүнүп тазалоо иштери кызуу жүрүүдө. Азыркы мезгилде атайын техникалар Спутник аймактык башкармалыгынын Манас көчөсүнүн боюндагы ири каналды тазалоодо.

Жалпысынан алганда шаар ичиндеги аталган сел арыктарынын узундугу 15 чакырымдан ашат. Буга чейин калаанын коммуналдык чарба жана көрктөндүрүү департаменти шаардык өзгөчө кырдаалдар бөлүмү менен биргеликте эң эле кооптуу деп аталган аймактарды тактап чыккан.

Тийиштүү кызматтар ири арык бойлоруна курулган дүкөндөрдүн, автоунаа жуучу жайлардын жана кызмат көрсөтүүчү башка имараттардын айланаларындагы сел арыктарды таза кармоого чакырышат. Анткени арык тазалоо иштери эске алынбаган курулуштардын боюнда техника менен иш алып барууга да бир топ ыңгайсыздык жаралат.