1,442 Бардыгы /

Бишкектин Биринчи май райондук сотунун алдына мурдагы президент Алмазбек Атамбаевди колдогон жана каршы ондогон адамдар митингге чыгышты.

«Азаттыктын» кабарчысы жеринен билдиргендей, чогулгандар «Алмазбек Атамбаев командасы менен камалсын!» деп кыйкырып турушат.

Митингдин катышуучусу, «Мээр жазы» фондунун төрайымы Ыргалай Бекмуратова “Атамбаев бийликте турган кезде жасаган кылмыштары үчүн жоопко тартылышы керек” деп айтты.

Соттун алдына Атамбаевди колдогондор да келишти. Алар “Атамбаев жана аны менен кошо камалгандар акталсын” деген талап коюшту. Парламент депутаты Ирина Карамушкина “Атамбаевге каршы митингдин артында бийлик турат” деген пикирин билдирди.

Соттун имаратынын алдына милициянын кошумча күчтөрү келди.

Атамбаевдин сотко катышуусуна тыюу салынды

Биринчи май райондук соту бүгүн, 1-июнда Кой-Таш окуялары боюнча ишти кароону улантууда.

Бишкектин Биринчи май райондук соту 1-июндагы отурумунда сот залынан мурдагы президент Алмазбек Атамбаевди чыгарды. Судья Марат Сыдыковдун чечимине ылайык Атамбаев эми Кой-Таш окуясы боюнча кылмыш иши каралып бүткөнгө чейин сот отурумдарына катышпайт.

Атамбаевдин адвокаты Сергей Слесаревдун айтканына караганда, мындай чечимдин кабыл алынышына адвокаттардын сот отурумунун учурунда Атамбаевди темир тор артына отургузууга каршылыгы негиз болду.

Жактоочу мурдагы президент башка иштер боюнча айыпталып жаткандыктан, аны Кой-Таш иши боюнча темир тор артында отургузууга да, сотко катыштырбай коюуга да негиз жок болчу деп эсептейт.

11-майдагы жараянда прокурорлор мындан ары мурдагы президент Алмазбек Атамбаев башка соттолуучулар менен катар темир тор ичинде отурушу керек деген өтүнүч келтирип, сот аны канааттандырган. Ага чейин Атамбаев адвокаттардын жанында отурчу.​

Буга чейин Атамбаев сотко катышуудан өзү баш тарткан учурлар белгилүү.

Мурдагы президент Алмазбек Атамбаев 2019-жылдын август айында Кой-Таш окуясында оор кылмыштар үчүн айыпталып, УКМКнын тергөө абагына камалган.

www.