754 Бардыгы /

БИШКЕК. Президент Сооронбай Жээнбеков Кыргыз Өкмөтүнө караштуу Мамлекеттик каттоо кызматынын төрагасы Акын Мамбеталиевди кабыл алды. Сүйлөшүү маалында өлкөнү санариптик трансформациялоо жана аймактарды өнүктүрүүнүн мамлекеттик саясатын, МКК системасындагы санариптештирүү боюнча долбоорлорду жүзөгө ашыруунун жүрүшү кенен-чонон талкууланды.

Акын Мамбеталиев өлкөнүн каттоо-эсепке алуу системасынын азыркы абалы, аны өнүктүрүүнүн келечеги, калкка мамлекеттик кызмат көрсөтүүлөрдү автоматташтыруу боюнча көрүлүп жаткан чаралар жөнүндө дагы маалымат берди. Мамлекеттик каттоо кызматынын төрагасы өлкөнү санариптик трансформациялоо жана аймактарды өнүктүрүү боюнча мамлекеттик саясаттын алкагында МКК системасында санаритештирүү боюнча жигердүү иштер улантылып жаткандыгын дагы кошумчалады.  Мамлекеттик каттоо кызматы тарабынан «iGov» мобилдик тиркемеси иштелип чыгып, ишке киргизилип жатканын билдирди. Анын жардамы менен жарандар алыстатылган идентификациялоо аркылуу мамлекеттик жана муниципалдык кызмат көрсөтүүлөрдү ала алышат. Бул тиркемеде электрондук документтер — айдоочулук күбөлүк, автоунаа техпаспорту, ID-карта камтылат. Анын жардамы менен жарандарда «Коопсуз шаар» долбоорунун алкагында өзүн идентификациялоо жана укук коргоо органдарынын кызматкерлерине санарип форматындагы документин көрсөтүү мүмкүнчүлүгү жаралат.

Соңунда Кыргыз Өкмөтүнө караштуу Мамлекеттик каттоо кызматынын төрагасы Акын Мамбеталиев болочокто «Түндүк» электрондук ведомстволор аралык өз ара аракеттенүү тутуму аркылуу ар бир Айыл Өкмөтү жана жарандар боюнча бардык маалыматтарды бириктирүүгө мүмкүндүк бере турган «Санарип аймак» долбоорунун жүрүшү тууралуу дагы айтып берди. Айыл аймактарынын тургундары белгилүү бир мамлекеттик кызматтарды райондук борборго келбей туруп эле Айыл Өкмөттөрүндө ала алышат.

Алишер ТОКСОНБАЕВ, өз кабарчы