832 Бардыгы /

БИШКЕК. Президент Сооронбай Жээнбеков өлкө аймактарынын жетекчилери, Бишкек жана Ош шаарларынын мэрлери менен санарип баарлашуу маалында аймактарда коронавирус инфекциясы менен күрөштү күчөтүү зарылдыгын баса белгиледи.

Мамлекет башчысы «өзгөчө абал алынды» деп, бошоңдоп калбай, талаптарды жеңилдетүү эрте экендигин эскертти: – «Кыймыл-аракетке, ишкердикке болгон катуу чектөөлөр алынганы менен, санитардык талаптарга байланыштуу чектөөлөр алынган жок! Ар түркүн акылга сыйгыс маалымат тараткандар арбыды. Ошондуктан, эл арасында түшүндүрүү иштерин күчөтүү абзел! Мында силерден жергиликтүү эл менен тыгыз иштөө абдан катуу талап кылынат.

Президент Сооронбай Жээнбеков жеке коргонуу каражаттарын сөзсүз колдонуу, социалдык аралыкты сактоо, ишканаларды дезинфекциялоо талаптарынын катуу сакталышы мэрлерге жана облус жетекчилерине жүктөлгөндүгүн дагы бир ирет эске салды. Республикалык штаб менен жергиликтүү бийлик органдарынын ортосундагы координацияны күчөтүү зарыл. Ошону менен бирге Мамлекет башчысы сырттан кайтып келген жана колдоого муктаж мекендештердин маселесине дагы өзгөчө көңүл бурду.

– Кайткандарды обсервацияларга жайгаштыруу, карантиндин шарттарын сактоону уюштуруу, аларды иш менен камсыздоо жана колдоо багытында ыкчам иш-аракеттерди жүргүзүү керек! Аларга туруктуу жумуш орундарын түзүү — жергиликтүү бийликтин түздөн-түз милдети. Ошондуктан, ар бир жетекчи облустун аймагындагы ири өндүрүш ишканаларынын туруктуу иштөөсүн жана жаңы инвестициялык долбоорлорду ишке киргизүүсүн көзөмөлгө алышы абзел! — деп жыйынтыктады Президент Сооронбай Жээнбеков.

Алишер ТОКСОНБАЕВ, өз кабарчы