855 Бардыгы /

          ОШ. Президент Сооронбай Жээнбеков Ош облусуна жасаган сапарынын алкагында Араван районундагы ирригация түйүндөрүн жакшыртуу жана калкты таза суу менен камсыз кылуу боюнча долбоорлорду ишке ашыруунун жүрүшү менен дагы кеёири таанышты.

Кыргыз Өкмөтүнө караштуу Суу ресурстары мамлекеттик агенттигинин директору Көкүмбек Таштаналиевдин маалыматына караганда, Араван районундагы Керкидан айылындагы ирригациялык каналдарды калыбына келтирүү боюнча долбоор толугу менен бүткөндөн кийин 2654 гектар аянтта суунун жеткиликтүүлүгү жакшырат, ошондой эле жыл сайын суу жоготуулары дагы азаят. Курулуш иштери 2018-жылдын январь айында башталып, бүгүнкү күндө дээрлик аяктап калды. Каналдардын жалпы узундугу болжол менен 60 чакырымды түзөт. Долбоор Дүйнөлүк банктын көмөгү аркасында ж\зъгъ ашырылууда.

Мамлекет башчысы ошондой эле Ош облусунун Араван районунун Керкидан жана Эсенбай айылдарындагы жана Ноокат районунун Кур-Таш, Каримберди айылдарындагы  калкты таза суу менен камсыз кылуу боюнча долбоорду ишке ашыруунун жүрүшү менен дагы таанышты. Курулуш иштери жакынкы убактарда аяктаары күтүлүүдө. Курулуш иштеринин толук бүткөрүлүшү менен аталган айылдардын үч миңдей тургуну таза суу менен камсыз этилет. Аталган долбоор республикалык бюджеттин эсебинен ж\зъгъ ашырылууда. Анын долбоордук-сметалык жалпы наркы 62,6 миллион сомду түзөт.

Президент Сооронбай Жээнбеков ирригациялык тармактарды жакшыртуу жана аларды модернизациялоо — өлкөнүн азык-түлүк коопсуздугун камсыз кылуу жана айыл чарба дараметин көтөрүү маселелери менен тыгыз байланышта экендигин баса белгиледи. Мамлекет башчысы сугат суу системасын жолго коюу жаңы сугат жерлери менен жумушчу орундарын түзүүгө, ички миграцияны кыскартууга жана аймактарды комплекстүү өнүктүрүүгө өбөлгө болоорун дагы кошумчалады. Президент мамлекеттик органдар менен жергиликтүү бийлик бул маселеге өзгөчө көңүл бөлүүсү керектигин дагы бир жолу эскертти.

Белгилей кетсек, өлкөнүн ирригациялык тутумун өнүктүрүү жана калкты таза суу менен камсыздоо ири Улуттук Долбоорлор жана Сооронбай Жээнбековдун Президенттик ишмердүүлүгүнүн негизги артыкчылыктуу багыттарынын бири болуп саналат. Кыргыз Республикасынын Ирригацияны өнүктүрүүнүн мамлекеттик Программасы 2026-жылга чейин үч этап менен ишке ашырылууда. Биринчи жана экинчи этаптын алкагында 2024-жылга чейин 31 суу чарба объектиси пайдаланууга берилет, жыйынтыгында 27 миң гектар жаңы сугат жери өздүштүрүлөт жана 46 миң гектар жердин суу менен камсыздалышы жакшырат. 2018-2019-жылдары республика боюнча 1364 гектар жаңы сугат жер өздөштүрүлүп, 3296 гаектар жердин мелиоративдик абалы жана 3569 га жерде суу менен камсыз кылуу жакшырган. Акыркы үч жылда өлкөнүн 107 айылынын тургундары таза суу менен камсыз этилди. 2018-жылы аталган долбоорлорду ишке ашырууга республикалык бюджеттен 350 миллион сом, ал эми 2019-жылы 500 млиллион сом бөлүнгөн. 2024-жылга чейин 715 айылда инфратүзүмдүк курулуш иштерин жыйынтыктоо жана жаңылоо пландаштырылууда.

Ушул тапта Кыргызстанда 588 айылдын тизмеси түзүлүп, жалпы жонунан 33 миллиард сомдук каражат булактары аныкталды. Таза суу боюнча долбоорлорду ишке ашырууда бюджеттик каржылоодон тышкары өнүктүрүү боюнча Эл аралык өнөктөштөрдүн каражаттары дагы жигердүү тартылууда. Жалпысынан жакынкы беш жыл аралыгында Кыргызстандын бардык аймактары таза суу менен толук камсыз этилет.

Алишер ТОКСОНБАЕВ, өз кабарчы