944 Бардыгы /

БИШКЕК. Кыргыз Республикасынын Тышкы иштер министрлигинде аталган министрликтин Коомдук Кеңешинин кезектеги жыйыны өткөрүлдү. Жыйынга Тышкы иштер министри Чыңгыз Айдарбеков жана министрликтин кызматкерлери катышышты. Жыйында Тышкы иштер министрлигинде аталган министрликтин Коомдук Кеңешинин жетекчиси Ишенгүл Болжурова төрайымдык кылды. 

Жыйын 2010-жылы июнь окуяларында каза болгондорду эскерүү үчүн бир мүнөттүк аза күтүү менен башталды. Министр Чыңгыз Айдарбеков ТИМдин COVID-19 пандемиясына байланышкан өзгөчө кырдаал шарттарында аткарган иши тууралуу Коомдук Кеңештин мүчөлөрүн кенен-чонон тааныштырды. Мисалы, Кыргыз Республикасынын Тышкы иштер министрлигижана анын чет өлкөлөрдөгү мекемелери биргеликте өлкөбүздү жеке коргонуу каражаттары, зарыл медикаменттер менен камсыздоо боюнча гуманитардык жана техникалык жардамды тартуу иштерин мобилизациялады. 2020-жылдын 20-майына карата лабораториялык тесттер үчүн 215 миң тест-системалар жана 3000 ашуун реагенттер, 1,15 миллион бир жолу урунулуучу беткаптар, 140 миңден ашуун фильтрлүү көп жолку респиратордук беткаптар, 85 миң коргонуучу комбинезондор, 734 миң медициналык мээлейлер, антисептик жана санитайзер түрүндөгү 28 миң литр дезинфекциялоочу каражаттар тартылган. 

Экспресс-тесттер, ПЦР тесттер жана аларга реагенттер түрүндөгү гумжардамдын алгачкы маанилүү партиялары Орусиядан, Кытайдан, Кореядан, Белорусиядан, Туркиядан алып келинген. Германия 500 000 евро өлчөмүндө каржылык жардам пакетин көрсөттү. Гуманитардык жардам ошондой эле АКШдан, Өзбекстандан, Казакстандан, Жапониядан, Швейцариядан, Ирандан, БАЭден дагы келди. Өкмөт мүчөсү ошондой эле чекаралар жабылган, каттамдар токтотулган шарттарда Кыргыз жарандарын чет өлкөлөрдөн алып келүү боюнча дипломаттардын аткарган ишин баса белгиледи. Атап айтканда, бул кыйынчылыктарга карабастан, ушул жылдын февраль айынын башталышынан тартып 9 июнга чейинки аралыкта 40 чет өлкөдөн 13 304 Кыргыз жараны алынып келинди.

Жыйындын соңунда Коомдук кеңештин мүчөлөрү Кыргыз Республикасынын Тышкы иштер министрлиги менен анын чет өлкөлөрдөгү мекемелеринин коронавирус пандемиясы мезгилинде мындан ары энатыйжалуу өз ара аракеттенүүсү боюнча сунуштарын дагы беришти.

Алишер ТОКСОНБАЕВ, өз кабарчы