842 Бардыгы /

ЧҮЙ. Үстүбүздөгү жылдын 11-июнунан тартып Кыргыз-Казак мамлекеттик чек ара тилкесиндеги Чүй облусунун Ысык-Ата районунда жайгашкан “Кең-Булуң-автожол” өткөрүү бекети ишке киришти. Бул туурасында Кыргыз Республикасынын Мамлекеттик чек ара кызматынан маалымдашты.

Казак тараптын демилгеси аркасында “Кең-Булуң-автожол” өткөрүү бекети атайын көрсөтмө болгонго дейре бир гана бош жүк ташуучу унаа каражаттарынын өтүшү үчүн ачылды. Муну менен башка өткөрүү жайларындагы жумуш жеңилдеп, бош жүк ташуучу унаа каражаттары үчүн ылдам өтүүгө мүмкүнчүлүк түзүлөт.  2020-жылдын 11-июнуна карата Кыргыз-Казак мамлекеттик чек ара тилкесинде төрт автожол өткөрүү жайлары иштеп жатат: Чүй облусунда “Ак-Тилек-автожол”, “Чалдыбар-автожол”, “Кең-Булуң-автожол” жана Талас облусунда “Чоң-Капка-автожол”.

Белгилей кетчү жагдай:  “Ак-Тилек авто жол” жана “Чоң-Капка авто жол” өткөрүү бекеттеринде Кыргыз Өкмөтүнүн 2020-жылдын 17-мартындагы  №84-р тескемесинин талаптарына ылайык  жарандар жана оор жүк ташуучу транспорт каражаттары гана өткөрүлүүдө. Ал эми Темир жол жүк тушуучу  курамдар “Каинды-темир жол” өткөрүү жайы аркылуу өткөрүлүүдө.

Алишер ТОКСОНБАЕВ, өз кабарчы