1,075 Бардыгы /

НЬЮ-ЙОРК.          Кыргызстандын БУУдагы туруктуу өкүлү Миргүл Молдоисаева БУУнун Башкы ассамблеясынын 74-сессиясынын Президенти Тижани Мохаммед Бандинин демилгеси боюнча уюштурулган, туруктуу өнүгүү максаттарын ишке ашырууга тез технологиялык өзгөрүүлөрдүн таасири жөнүндө жогорку деңгээлдеги тематикалык дебаттарына активдүү катышты. Бул иш-чаранын негизги темасы ыкчам технологиялык өзгөрүүлөрдү эске алуу менен туруктуу өнүгүү максаттарын жүзөгө ашырууда БУУнун, көп тараптуу институттардын жана башка кызыкдар тараптардын иши жөнүндө маалыматтарды жайылтуу эле.

         Аталган иш-чарага БУУнун Башкы ассамблеясынын 74-сессиясынын Президенти Тижани Мохаммед Банде, БУУнун Баш катчысы Антонио Гутерриш, БУУнун экономикалык жана социалдык кеңешинин төрагасы Мона Юул, ошондой эле Соода, жана өнүктүрүү жана жеке түзүмдөр боюнча БУУ конференциясынын Электро-байланыш эл аралык союзунун өкүлдөрү активдүү катышышты. БУУнун Баш катчысы Антонио Гутерриш БУУга мүчө өлкөлөр үчүн сунуштар менен технология жаатында кызматташууну өнүктүрүүнүн «Жол картасын» тааныштырды. БУУнун башка лидерлери адам укуктарын сактоо менен санариптик теңсиздикти жеңүүнүн маанилүүлүгүн дагы баса белгилешти.

        Соңунда  Кыргыз Республикасынын БУУдагы Туруктуу өкүлү Миргүл Молдоисаева технологияны жайылтуу жаатында Эл аралык кызматташтыкты өнүктүрүүнүн маанилүүлүгүн баса белгиледи. Бул өңүттөгү маанилүү маселелердин бири бул туруктуу өнүгүү максаттарын ишке ашыруу максатында долбоорлорго карызды конвертациялоо механизмин киргизүү менен өнүгүп келе жаткан өлкөлөрдүн тышкы карызын реструктуризациялоону аныктоо. Ошондой эле Миргүл Молдоисаева Кыргызстанда төмөнкү долбоорлор ишке ашырылып жаткандыгы жана заманбап маалыматтык-коммуникациялык технологияларды жайылтуу боюнча долбоорлорду ишке ашыруунун улантылышы жөнүндө дагы кеңири маалымат жасады.

Алишер ТОКСОНБАЕВ, өз кабарчы