576 Бардыгы /

Кыргызстанда кармалып, Өзбекстанга өткөрүлүп берилген өзбекстандык журналист Бобомурод Абдуллаев адвокаттар аркылуу ачык кайрылуу таратты.

Анын адвокаттарынын бири Тимур Карабаев 27-августта «Азаттыкка» билдиргендей, катта Абдуллаев Кыргызстандын Улуттук коопсуздук боюнча мамлекеттик комитетинин (УКМК) тергөө абагында кыйноого туш болгонун айткан.

Ал өзүн кармаган атайын кызматтын өкүлдөрү адвокат менен байланыштырбай койгонун, чөнтөк телефонун күчтөп тартып алып, эч кандай протокол түзүлбөгөнүн, УКМКнын тергөө абагында да адвокаттар менен байланышууга мүмкүнчүлүк берилбегенин, тергөөчү аны адвокаттарсыз эле өзүн Озбекстанга өткөрүү тууралуу документке кол койдурууга аракет кылганын, батири мыйзамсыз текшерилгенин, кол койдуруу үчүн тергөөчүлөрдүн бири өзүн сүлгү менен муунтканын, атайын кызматтын мыйзамсыз аркеттерине каршылык иретинде 12-15-августта ачкачылык жарыялаганын белгилеген.

УКМК өзбекстандык журналисттин кайрылуусуна комментарий бере элек.

Буга чейин Бобомурод Абдуллаевдин адвокаттары УКМКга каршы Башкы прокуратурага арыз менен кайрылышкан. Алар Башкы прокуратурадан Абдуллаевдин катын расмий арыз катары карап, анда жазылган фактыларды Кылмыштар менен жоруктардын бирдиктүү реестрине каттап, сотко чейинки териштирүү ишин баштоону өтүнүп жатышат.

УКМК өзбек бийлигинин суроо-талабы менен Бишкекте кармалып, убактылуу кармоо жайында отурган журналист Бобомурод Абдуллаев 14 күндөн кийин, 22-августта Ташкентке өткөрүлгөнүн кабарлаган.

Абдуллаев 23-августта Ташкентте жүрүм-турум эрежелерин бузбоо жөнүндө тилкаттын негизинде бошотулганын анын Өзбекстандагы адвокаты Сергей Майоров «Азаттыктын» өзбек кызматына билдирген.

Адвокаттар Абдуллаев качкын макамын суранып арыз бергенине карабай, атайын кызмат журналистти Өзбекстанга өткөрүп бергенин сынга алышууда.

Буга чейин бир катар эл аралык уюмдар кыргыз бийлигинен Бобомурод Абдуллаевди Өзбекстанга өткөрүп бербөөнү талап кылышкан.

WWW.