981 Бардыгы /

ЖАЛАЛ-АБАД. Жалал-Абад облусунда Кызыл китепке кирген күрөң аюуну өлтүрүп, терисин алып бараткан жаран жолдо кармалды. Бул тууралуу Кыргызстанга Биотүрдүүлүктү сактоо жана өзгөчө корголуучу жаратылыш аймактары департаментинин Жалал-Абаддагы өкүлчүлүгүнүн башчысы Турат Сатимбаев маалымдады.

Турат Сатимбаевдин айтымында, окуя ушул жылдын 9-апрелинде Базар-Коргон районунун Кызыл-Үңкүр айылына караштуу жайлоодо катталды.  Күмөндөлүп жаткан жаран балчы экендигин, аюу бал челектерин талкалай бергенде гана аны акыры өлтүргөндүгүн моюндады.

“Бизге түшкөн маалыматтын негизинде эки кызматкерди ээрчитип

алып айтылган аймакка барганбыз. Тоодон баштык көтөрүп келе жаткан адам баштыгын катып жатканын көрдүк. Текшере келгенде андан жаңы союлган аюунун териси чыкты. Ал Кызыл-Үңкүр токой чарбасында балчы экендигин, аюу бал челектерин талкалай бергендиктен ага тузак коюп кармап, өлтүргөнүн айтты”, -деп кошумчалады Кыргызстанга Биотүрдүүлүктү сактоо жана өзгөчө корголуучу жаратылыш аймактары департаментинин Жалал-Абаддагы өкүлчүлүгүнүн башчысы Турат Сатимбаев.

Бул фактынын негизинде дароо эле акт түзүлүп, бардык документтер жана өлтүрүлгөн аюунун териси Жалал-Абад облустук милициясына өткөрүп берилди. Турат Сатимбаев Жалал-Абад облусунда 2020-жылдын аягындагы эсеп боюнча 234 аюу бар экендигин кошумчалады. Баса, Кыргызстанда аюуну атууга уруксат жок. Мыйзамсыз аңчылык кылгандарга бир миллион сом айып пул салынат.

Алишер ТОКСОНБАЕВ, өз кабарчы