1,920 Бардыгы /

БАТКЕН. Кадамжай районунда 80 гектар жер тилкеси жеке менчикке мыйзамсыз берилип кеткен. Бул жөнүндө Башкы прокуратуранын басма сөз кызматы жарыялады.

Маалыматка таянсак, прокурордук текшерүүнөн жүрүшүндө Баткен облусунун Кадамжай районундагы Үч-Коргон Айыл Өкмөтүнүн аймагынан 80 гектар жайыт жердин жеке тараптарга турак жай куруу үчүн менчикке берилип кеткендиги ырасталды. Айтмакчы, аталган Айыл Өкмөтү тарабынан жайыт жер 615 тилкеге бөлүнүп, алардын көпчүлүгүнө жарандар тарабынан жерге карата менчик тууралуу мамлекеттик актылар дагы алынып калган.

Ошентип, текшерүүнүн жыйынтыгына ылайык Кадамжай райондук прокуратурасы Үч-Коргон Айыл Өкмөтүнүн чечимдерин жана жеке менчик тууралуу укук таануучу документтерди жокко чыгаруу боюнча Баткен облустук административдик сотуна доо арыз менен кайрылды.

Буга улай жогорудагы факты кылмыштар менен жоруктардын бирдиктүү реестрине Кылмыш-жаза кодексинин 320-беренеси (кызмат абалынан кыянаттык менен пайдалануу) менен катталып, бүгүнкү күндө тергөө иштери кызуу жүргүзүлүүдө.

Алишер ТОКСОНБАЕВ, өз кабарчы