636 Бардыгы /

Борбор Азиядагы наркосаясат борборунун директору, тарых илимдеринин кандидаты, полковник Александр ЗЕЛИЧЕНКО Кыргыз Республикасынын жетекчилигинин соңку таптагы Аймактагы туруктуу коопсуздукту бекемдөө аракетин, ошондой эле бул өңүттө ырааттуу жүргүзүп жаткан акыркы реформаларын абдан оң сыпаттады. Ошондой эле Кыргыз-Тажик Чек арасында атайылап дестабилизация (башаламандык) уюштурууга кызыкдар күчтөр дагыле бар экендигин кабарчыбызга курган маегинде эч жашырган жок.

-Александр мырза, Кыргыз-Тажик Чек арасындагы соңку куралдуу кагылышууга Сиз кандайча баа берээр элеиңз?

-Алишер,  жанагыл Баткендеги Кыргыз-Тажик Чек арачыларынын өз ара аткылашуусу, биз каалайбызбы, каалабайбызбы,бардык чырдын чекеси гана. Анткени, бул Аймак –  наркотрафик, контрабанда, мыйзамсыз миграция жана ушул өңдөнгөн далай жосунсуз жоруктардын нукура чордону. Бул наркожолду заматта эле ар тарабынан бууп таштадык эле, көрдүңөр го, өз убагында Баткенде Кыргыз-Тажик Чек арасындагы куралдуу кагылышууну дароо уюштуруп ийишпедиби.

-Эмне ушинтип эле Чек ара чыры мындан ары деле басылбайбы?

-Мен дагы патриот катары Чек арадагы эки өлкөнүн тирешүүсү жакын арада гана басылышын куп каалаймын. Муну үчүн Кыргыз-Тажик мамилелериндеги олуттуу көйгөйлөрдү чукул арада жайгаруу максатында биз бардык ресурстарыбызды толук кандуу пайдалануубуз кажет! Мунсуз конфликт, өз ара тирешүү, тескерисинче, бара-бара мындан беш бетер өөрчүйт. Дегеним бүгүнкү күндө Кыргыз-Тажик Чек арасында атайын дестабилизация (башаламандык) уюштурганга кызыкдар күчтөр дагыле бар. Анда ЖККУнун жана ШКУнун түздөн-түз кийлигишүүсүз өлкөбүз дегеле тынчыбайт. Абдан опурталдуусу: жергебизде туруктуу стабилдүүлүк дагы орнобойт!

-Чек ара чырына нарко кырдаал дагы кошул-ташыл болуп жаткан жокпу?

-Кантип? Биз маңзат үзгүлтүксүз өндүрүлгөн Ооганстанга өтө эле жакынбыз. Ошону үчүн Кыргызстан жана Тажикстан аркылуу маңзаттын ири партиясы байма-бай ташылып турат. Мындайча айтканда, Кыргызстан Борбор Азиядагы наркокоридорго эбак айланган. А түгүл өлкөбүздө наркотикти химиялык жол менен даярдаган лабораториялар дагы иштеп жатышпайбы. А бул маңзат рыногунун түзүмүн ого бетер кеңейтти.

-Александр мырза, эмне, анда ушинтип эле кол куушуруп олтура беребизби? Деги туңгуюктан акыры бошонуунун аргасы бардыр, эй?

-Албетте, амбицияга азгырылып, ЖККУ жана ШКУ Эл аралык уюмдарын НАТОго тынымсыз каршылаштыруунун ушул тапта дегеле кажети жок! Мындан ары өзүбүз Аймактарда гана туруктуу иштөөнү активдештиргенибиз оң! Айрыкча жер-жерлерде ашкере радикалдар менен тынымсыз күрөшүүгө тийишпиз! Анткени, булар – радикалдуу көз караштагылар каалаган тилкесинде, каалаган убакытта ар кандай чоң-кичине жаңжалдарды, а түгүл террактыларды уюштурганга дагы жөндөмдүү! Буларга каршы ЖККУнун жана ШКУнун өлкөлөрүндө атайын жана ар тараптуу машыгууларды уюштуруу абзел! Кыргызстанда бул өңүттө алгачкы кадамдар жасалды. Маселен, Баткендеги ата мекендик аскерлердин жана күч түзүмдөрүнүн катышуусунда  тактикалык машыгуулар жүрбөдүбү. Арийне, мындай аракеттин үзүрүн кийин-соң сөзсүз көрөбүз…

Кепке тарткан: Алишер ТОКСОНБАЕВ, өз кабарчы