1,239 Бардыгы /

БАТКЕН. Эң соңку маалыматтарга караганда, Кыргыз-Тажик мамлекеттик чек арасындагы жаңжалдын кесепетинен Баткен облусунун аймагында 136 турак жай толугу менен талкаланды. Баткендеги чек ара чырынан кыйраган объектилерди толук кандуу калыбына келтирүү максатында мамлекеттик бюджеттен 700 миллион сом бөлүндү.

-Аталган каражаттын 500 миллион сому социалдык объектилерди калыбына келтирүүгө жана жабыркаган айылдарга алып баруучу жолдорду курууга багытталат. Калган 200 миллион сому талкаланган турак жайларды курууга сарпталат. Дал ушул жерде бизге Сиздердин тажрыйбаңыздар абдан керек! Биз бардык тийиштүү шарттары каралган заманбап турак жайларды курушубуз абзел. Эң негизгиси – күз мезгилинин башталышына дейре жабыркаган жарандар турак жайларга жайгашып калышы үчүн ишти тез арада баштообуз шарт! – деди премьер-министр Улукбек Марипов курулуш компанияларынын жетекчилери менен жолугушуусунда.  – Ушул тапта Өкмөт Кыргыз-Тажик чек арасындагы кагылышуудан жабыркаган турак жайларды, социалдык жана инфраструктуралык объектилерди калыбына келтирүү, шилендилерди тазалоо ишине киришти. Баткен облусунан кечээ эле келдим. Келип курулуш компаниялардын өкүлдөрү талкаланган жана өрттөнүп кеткен жайларды калыбына келтирүүгө колдон келген көмөгүн көрсөтүүнү билдирип жаткандыгын угуп кубандым. Биз иш ыкчам жана сапаттуу жүрүшү үчүн күч-аракетибизди координациялообуз керек. Калыбына келтирүү үчүн каражат бар жана алар бөлүнгөн, бирок көмөгүңүздөр ашыкча болбойт!

Кошумчалай кетээрибиз: Кыргыз-Тажик мамлекеттик чек арасындагы жаңжалдын натыйжасында Баткен облусунун аймагында 136 турак жай толугу менен талкаланган. Мунун ичинде 46сы Баткен районунда, 93ү Лейлек районунда жайгашкан. Мындан тышкары, 5 жалпы билим берүүчү мектеп, 2 фельдшердик-акушердик бекет, 3 бала бакча, 2 милиция бекети, 24 май куюу бекети, 60 коммерциялык объект, 2 чек ара заставасы жана жалгыз клуб жараксыз абалга кептелген.

Алишер ТОКСОНБАЕВ, өз кабарчы