1,974 Бардыгы /

Мен “согуш балдары” атангандардын бири экенмин. 88 жаш курагымда өмүрүмө сереп салып кейиштүү да, кубанычтуу да учурларымды эстеп отурган чагым.

Менин байкем Төрөмамат (көбүнчө Төкө дечүбүз)1942-жылы 18-февралда Уулу Ата Мекендик согушка аттанып кеткен. Агамын бир катында «иним Кенжебай 1-класска барып жүрөбү» деп жазган экен, көрсө ошол каты акыркысы болуп, 20 жашында курман болуптур. Ата-энемден 10 жашымда айрылып, жетимдиктин турмушун көрдүм. Кара жумушка кичинемден баштап талаадан куурай-тезек терчүмүн. Ошол учурда эл арасында жакырчылык башталып жапайы буурчак, кант кызылчасы, башкача айтканда жегенге боло турган бардык нерселерди жеген күндөр болгон. Сабактан кийин колхозго да жардам берчүбүз. Николай Шаронин деген бала экөөбүз кызылчага культивация салып иштеп жүрдүк. 7-классты бүткөн соң Жалал-Абад шаарындагы кыргыз орто мектебине кирдим. Жакшы жери жатак мектеп болгондуктан окуучулар тамак-аш_; кийим-кече, жатакана менен мамлекет тарабынан камсыз болчу. Бизди мыкты мугалимдер окутушчу. Ошол убактагы окуучулар ынтызарлык менен окушат эле. Сабактан кийин колхозго пахта терүүгө жардамдашчубуз. Орто мектепти бүткөн соң ар бирибиз ар башка жогорку окуу жайларына кирип түрдүү кесиптерге ээ болдук. Айта кетсем: Т.Молдобаев акын, С. Далбаев артист, Б. Матисаков, К. Ташиев, У. Каримов мугалим, Б.Каипов теле режиссёр болду, Ш. Кубатов, М.Арыкбаев, Т. Кабылов, М. Абдыкадыров, О. Тургунбаев, К. Кожоназаров жана мен дарыгерлик кесибин аркаладык. Аталган адистер элге таза кызмат өтөдүк. Кеңеш өкмөтүнүн жоюлуп кетүүсү өтө кейиштүү болду.

«Согуш балдары» Ч.Айтматов, Б.Жакиев, М. Байжиев жана миң деген кыргыз жарандары элге ак кызмат өтөштү. Мага дагы «Согуш балдарына» арнап чыгарылган төш белгисин берип кетишти. Союзга кирген бардык республикалардын «Согуш балдары» аталгандардын тагдыры бирдей болгон. Согуштун кесепетинен биз көргөн азап-тозокторду биздин балдар, небере-чеберелер көрбөсө экен деген ой-тилек, үмүт менен жашап келем.

Замандаштарымдын баарына жакшылыктарды тилейм, бар болушсун

Азыркы жаштарга айтарым терең билимдүү, акылдуу, жакшы адамдардан болгула!

Караңгылыктан качкыла! Өлкөбүздүн өнүгүшүнө бардык мүмкүнчүлүгүңөрдү жумшагыла.

Кенжебай ИСМАЕВ, Сузак району Октябрь айылы

29.04.2021 жыл