1,425 Бардыгы /

КЫРГЫЗСТАНДЫК ДАРЫГЕР

ЭЛ АРАЛЫК СЫЙЛЫКТАРДЫН ЭЭСИ

Дүйнөнү дүрбөлөңгө салган коронавирус пандемиясы менен күрөшүүдө өзүнүн ден соолугун, өмүрүн тобокелге салган врачтардын эмгеги мактоого арзыйт. Алардын катарына Өзгөн районундагы оорукананын жугуштуу оорулар бөлүмүнүн башчысы Абиба Хабибова да бар.

Тажрыйбалуу врач Абиба Хабибоважашы бир топко барып калгандыгына карабастан өткөн жылы март айында башталган коронавирус пандемиясы менен күрөштүн сап башында келет.  Бул аралыктын ичинде анын колунан нечендеген бейтаптар айыгып чыкты. Алардын арасында коңшулаш Өзбекстандын, Россия Федерециясынын жарандары да бар болчу.

Карантин башталып, чек аралар жабылганда Кыргызстандагы туугандарына конокко келип, кайра өз өлкөсүнө кете албай коронавирус илдетине кабылган  Өзбекстандын жана Россия Федерециясынын бир нече жарандары анын колунан дарыланып чыгышкан. Алар ак халатчанга ыраазылык сөздөрүн чын дилинен  айтып кетишкен болчу.  

Өзбекстандагы  Борбор Азиядагы “Янги Овоз” Жазуучулар жана тарыхчылар   Союзу коронавирус пандемиясы менен күрөшүүдө башкалардан айырмаланган   чет өлкөлүк врачтарды «Короновирус илдетине каршы күрөшүүдөгү эмгеги үчүн»  төш белги менен сыйлоону туура табышкан. Алардын арасында Кыргызстандын Өзгөн районундагы оорукананын жугуштуу оорулар бөлүмүнүн башчысы  Абиба Хабибова да бар болчу. Бул сыйлыкты жакында оорукананы жамаатынын жалпы чогулушунда Өзгөн райондук мамлекеттик администрация башчысынын-акимдин орун басары Рахимбек Мырзакулов тапшырды. 

Ал Өзгөн районунда дүйнөнү дүрбөлөңгө салган коронавирус пандемиясынын үчүнчү толкунуна даярдык боюнча жүргүзүлүп жаткан иш-чаралар боюнча маалыматтарды баяндап берди. Анын айтуусунда  боюнча райондо  бул илдет менен 41 бейтап ооруканага жаткырылган. Район боюнча 84 кислороддук концентратор17 ИВЛ, бир жолу колдонуллучу 4292, көп жолу колдонулуучу 322 даана комплект бар. Учурдагы катаал мезгил өз баатырларын алып чыгып алардын алдыңкы сабын ак халатчандар тургандыгын, Абиба Хабибованын эл аралык сыйлыктары жалпы жамааттын гана эмес, райондун да  сыймыгы экендигин белгилеп өттү.

Өзгөн районундагы оорукананын жугуштуу оорулар бөлүмүнүн башчысы Абиба Хабибовага  ошол эле күнү   Россия Федерациясынын Москва шаарындагы эл аралык  уюмдун «Эмгектеги каармандыгы үчүн» медалы да тапшырылды. Аны Россия Федерациясынын жана Кыргызстан  жазуучулар союзунун мүчөсү, бир нече эл аралык сыйлыктардын ээси  Жолдошбек  Монолдоров  врачтын көкүрөгүнө такты.

 Ж.Моңолдоровдун айтуусунда  өзүнүн ден соолугун тобокелге салган биздин ак халатчан дарыгерлерибиздин эмгеги чет өлкөлүктөр тарабынан бааланып жаткандыгы- бизди абдан сыймыктандырат.

Жалпы жамаат кош сыйлыктын ээси болгон  кесиптешин чын жүрөктүн куттукташып,  эл алалык уюмдарга ыраазылыгын айтышты.

Төлөнбай АБДЫРАЗАКОВ, Ош шаары