1,446 Бардыгы /

     ОШ. Санариптик өнүктүрүү министрлигинин маалыматына караганда,  Кыргызстандын Түштүк башкалаасындагы 11 кесилишке заманбап видеокамералар орнотулду.

Маалыматка караганда, «Г» формасындагы ар бир түркүккө үчтөн видеокамера бекитилген. Алардын биринчиси жол кыймылынын коопсуздугун көзөмөлдөйт. Жол сызыктарынын, жөө адамдар өтүүчү жана веложолдорду тебелеген, каршы тилкеге чыгып туура эмес жерден кайрылган, ылдамдыкты көбөйтүп, жол чырактын талабына көңүл бурбагандарды сөзсүз каттайт. Экинчиси, унаалардын агымына байкоо салат. Ылдамдыкты өлчөп, машинелердин мамлекеттик номурларын сүрөткө тартып, эреже бузгандарын «Коопсуз шаар» долбоорунун базасына киргизет. Ал эми үчүнчүсү, жалпы көрүнүштү дааналап тартып берет. Токтотууга тыюу салынган жерге коюлган машинелерди аныктап, «Коопсуз шаар» долбоорунун базасына түз жиберет. Көзөмөл видеокамералары күнү-түнү иштешет.

Кыргызстанда 2019-жылдан тартып «Коопсуз шаар» долбоору ишке киришкен. Аталган долбоор башталгандан берки аралыкта жол эрежесин бузган айдоочуларга 2 миллион 373 миң 355 сомдук токтом толтурулду. Булардын арасынан ошол токтомдордун негизинде 1 миллион 566 миң 870 сом айып пул төлөндү. Аталган мекеменин башкы адиси Айнура Замирбекованын айтымында жалпысынан Ош шаарынын ичинде 35, ал эми калаадан тышкары 34 жерге видеокамералар коюлат. “Коопсуз шаар” долбоорунун экинчи баскычын Кытай ишканасы утуп алган. Ал эми аталган долбоордун биринчи этабын орусиялык “Вега” компаниясы жүзөгө ашырган.

Алишер ТОКСОНБАЕВ, өз кабарчы