1,197 Бардыгы /

          БАТКЕН. Министрлер кабинетинин төрагасы Улукбек Мариповдун жетекчилиги астында ушул жылдын 13-октябрында Баткен шаарында “Баткендин өнүгүүсү – өлкөнүн өнүгүүсү” аталышындагы Инвестициялык Форуму өткөрүлөт. Бул жөнүндө Эл аралык ишкерлер Кеңешинен билдиришти.

Эске салчу жагдай: үстүбүздөгү жылдын 4-майында Кыргыз Республикасынын президентинин “Баткен облусунун чек ара айылдарын калыбына келтирүү жана өнүктүрүү боюнча биринчи кезектеги чаралар жөнүндө” Жарлыгы Аймактагы чек ара айылдарын эрте калыбына келтирүүгө көмөктөшүү максатында жарык көргөн. Ошентип, узак мөөнөттүү болочокто региондун социалдык-экономикалык өнүгүү концепциясын аныктоо жана инвестиция тартуу үчүн Инвестициялык Форум дагы пландаштырылган. Анда баса белгиленгендей, бул иш-чара мамлекеттик-жеке диалогдун аянтчасы болуп калат. Мунун жүрүшүндө Кыргызстандын каржы институттары инвестициялык долбоорлорду каржылоо механизмдерин даана көрсөтүшөт. Ошондой эле Дүйнөлүк эксперттер Ата Мекендик ишкерлер үчүн практикалык семинарларды дагы өткөрүшөт.

“Баткендин өнүгүүсү – өлкөнүн өнүгүүсү” аталышындагы Инвестициялык Форумдун катышуучулары долбоорлорго кредиттер боюнча кепилдиктерди берүүнүн шарттарына, өрүктү кайра иштетүү боюнча логистикалык борборду түзүүгө, пилоттук бизнес экосистемасына негизделген Аймакты Өнүктүрүү концепциясын жана Баткенди өнүктүрүүгө байланышкан көптөгөн башка маселелерди дагы маңдай-тескей талкуулашат. Ошондой эле Баткендеги мейманкана жана Исфана шаарындагы логистикалык борбордун долбоору кошо көрсөтүлөт.

Алишер ТОКСОНБАЕВ, өз кабарчы