807 Бардыгы /

ОШ. Туркиянын Стамбул шаарынан сегиз жылдын аралыгында ичинде араң аткарылган алгачкы каттам Ош эл аралык аэропортуна салтанаттуу түрдө кондурулду.

Мындан ары Пегасус авиакомпаниясынын Боинг 737 учагы Стамбул-Ош-Стамбул каттамына үзгүлтүксүз жана жумасына 3 жолу каттайт. Стамбулдан бул сапар Ошко 130 жүргүнчү учту. Ал эми 155 жүргүнчү кайра Стамбулга учуп кетишти.

-Бүгүн тарыхый күн деп атоого болот. Анткени Стамбул-Ош-Стамбул багыты боюнча учуу кайрадан калыбына келтирилди. Бул багытта учуулар сегиз жылдан бери жүргүзүлбөй келаткан. Бул ошондой эле өлкөнүн экономикалык потенциалын жана туристтик секторун жогорулатат! – деди “МАМ” ачык акционердик коомунун Аймактык аэропорттор боюнча төрагасынын орун басары Абдималик Бусурманкулов.

Ал эми Pegasus Уюмунун сатуу өкүлү Юсуф Эрман бул каттамдын  жандандырылышы боюнча иштер эки жылдан бою үзгүлтүксүз сүйлөшүлгөндүгүн баса белгиледи: – Бул каттамдын ачылышы биздин мамлекеттердин жана Фергана өрөөнүнүн жүргүнчүлөрүнүн аба транспорту боюнча болгон керектөөсүн канааттандырат. Бул Стамбул аркылуу дүйнөнүн 19 өлкөсүнө жана Түркиянын 22 шаарына андан ары транзитке мүмкүнчүлүк дагы берет. Бул дагы Ош шаары жана Кыргызстандын бүтүндөй түштүк аймагынын туристтик жерлери үчүн чоң жарнак!

Баса, Туркиянын Стамбул шаарынан сегиз жылдын аралыгында ичинде араң аткарылган алгачкы каттамды Ош эл аралык аэропортунда тосуп алуу аземине Президенттин Ош облусундагы ыйгарым укуктуу өкүлү Зиядин Жамалдинов, «Манас» эл аралык аэропорту» ААКсынын башкы директорунун инфраструктура жана региондук өнүгүү боюнча орун басары Абдималик Бусурманкулов, “МАМ” ААКнын башкы директорунун экономика, каржы жана тузду иштетүү боюнча орун басары Рысбек Оморов, ташуучу компаниянын өкүлдөрү, “МАМ” ААКтын кызматкерлери катышышты.

Алишер ТОКСОНБАЕВ, өз кабарчы