864 Бардыгы /

          ОШ. УКМКнын Ош шаардык жана Ош облустук башкы башкармалыгы Кара-Суу районуна караштуу Папан айыл өкмөтүнүн айрым тургундарынын жалпыга маалымдоо каржаттары аркылуу “Кыргыз Республикасынын УКМКсы (Улуттук коопсуздук мамлекеттик комитети) таптакыр иштебейт” деген билдирүүсүн четке какты.

Анткени Ош облусунун Кара-Суу районунун Дыйкан-Кыштак айылынын тургундарынын арызынын негизинде жарандык сот инстанцияларынын отурумдары болуп өткөндүгү аныкталды. Жыйынтыгында Дыйкан-Кыштак айылынын тургундары аларга таандык “үлүш” жерлерине Папан айыл өкмөтүнүн тургундары мыйзамсыз үйлөрдү куруп алышкандыгын белгилеп, мыйзам чегинде курулуш иштерин токтотуп, курулуп калган үйлөрдү сүрдүрүп берүүнү өтүнүшкөн. 

Ошентип Жогорку Соттун 2021-жылдын 28-июнундагы чечимине ылайык мыйзамсыз курулуш деп табылып, үйлөрдү сүздүрүү иштери Кара-Суу районунун сот аткаруучулар кызматына жүктөлгөн. Муну менен катар буга чейин мыйзамсыз курулуш иштерин жүргүзүп жаткан Папан айыл өкмөтүнүн тургундарына, “үлүш” жер ээлери жана жергиликтүү бийлик өкүлдөрү тарабынан бир нече ирет мыйзамсыз курулуш иштерин токтотуу боюнча абдан катуу эскертилген. Акыры айласы таптакыр куругунда үстүбүздөгү жылдын 28-сентябрь күнү аймактык сот аткаруучулар баштаган комиссия тарабынан аталган жерде курулуп бүткөн мыйзамсыз 14 үйдүн 2 үйү атайын техникалар менен сүрдүрүлгөн. 

Кыскасы, аталган чечим жарандык тартипте гана каралган соттук чечим болуп саналат. Буга УКМКнын Ош шаардык жана Ош облустук башкы башкармалыгынын жана анын жетекчилигинин эч кандай тиешеси жок!

Алишер ТОКСОНБАЕВ, өз кабарчы