684 Бардыгы /

Жогорку Кеңештин 13-октябрдагы жыйынында депутат Дастан Бекешев менен Улуттук коопсуздук боюнча мамлекеттик комитеттин (УКМК) төрагасынын милдетин аткаруучу Камчыбек Ташиевдин ортосунда Бажы кызматынын төрагасынын мурдагы орун басары Райымбек Матраимовго байланыштуу кайым айтышуу болду.

Бекешев “Министрлер кабинетинин айрым мүчөлөрү “кустуризация” болуп жаткандардын тоюна барганын бир столдо отурганын көрүп, көптөгөн жаштар өлкөдөн кетип калгысы келүүдө. Алар мунун баарын көрүп көңүлү калууда. Ушундай үлгү көрсөтүп жатышса эмне кылышат?” деген суроо койду.

УКМК жетекчиси Ташиев Бекешевди “сындап эмес, каралап жатасыз” деди:

“Биринчиден, Райым Матраимов менен бир столдо отурган жокмун. Экинчиден, мен чыгып, сөз сүйлөп, кете бердим. Үчүнчүдөн, отурган болсом да, жаман бир нерсе кылдым деп ойлобойм. Себеби, ал башкалардан айырмаланып, 2 миллиард сом төлөдү. Эгер анын башка да мыйзам бузууларын тапсак, дагы төлөйт. Эч ким аны калкалабайт. Бажыдагы схемаларды токтотуп жаткандыктан 150 миллиард сомдон ашуун бюджетке түшүүдө”.

УКМК Матраимовго карата коррупцияга байланыштуу иш козгоп, ал өзү жана бажыдагы башка кызмат адамдары 2016-жылдын башында коррупциялык схема түзүшкөнүн билдирген.

11-февралда Бишкектин Биринчи Май райондук соту Матраимовду күнөөлүү деп таап, 260 миң сомдук айыппул чегерген.

Матраимов өзү сотто көрсөтмө берип жатып күнөөсүн моюнуна аларын айткан.

Ал эми кылмыштуу кирешени легалдаштыруу (адалдоо) фактысы боюнча Матраимовду УКМК быйыл 18-февралда камакка алган. 15-апрелде далил табылбаганын билдирип, териштирүүнү токтоткон жана өзүн эркиндикке чыгарган.

Жакында Матраимов конок катары катышкан тойлордун бирине Ташиев да барганы интернетте кызуу талкууланып, “Коррупцияга каршы мекеменин башчысы ири коррупционер экенин моюнуна алган адам менен бир иш-чарада жүргөнү канчалык туура?” деген суроолор коюлган.

WWW.