2,421 Бардыгы /

ЖАЛАЛ-АБАД. Ноокен райондук ички иштер бөлүмү тарабынан кылмыштуулуктун жаштар арасындагы укук бузуулардын, үй-бүлөлүк зордук-зомбулуктардын, диний экстремизмдин алдын алуу боюнча семинар болуп өттү.

Жалал-Абад ОИИБдин басма сөз кызматы маалымдагандай,кылмыштуулуктун, диний экстремизмдин алдын алуу боюнча өткөрүлгөн семинарга Ноокен РИИБдин жана райондук администрациянын жетекчилиги, УКМКнын, социалдык өнүгүү бөлүмүнүн кызматкерлери, айыл өкмөттөрдүн социалдык маселелер боюнча адистери, соцпедагогдор, айыл имамдары катышышты. Иш-чаранын башталышында Ноокен РИИБдин начальниги, милициянын полковниги Алтынбек Мусаев сөз сүйлөп, семинардын аталышы, мааниси тууралуу катышуучуларга түшүндүрмө берди. Ошондой эле район аймагында жаш өспүрүмдөр арасындагы кылмыштуулуктун, сууга чөгүүлөрдүн, суициддин алдын алууда биргелешкен иш-чараларды күчөтүүгө чакырды.

Андан соң Ноокен районунун акиминин орун басары, балдар иши боюнча төрайым Зияда Юлдашева сөз сүйлөп, бул иш-чара аябай жакшы уюштурулганын, учурдун эң актуалдуу маселеси талкууга коюлганын белгиледи. Мындай семинарлардын санын көбөйтүп, сапатын мындан ары да жогорулатуу боюнча сунушун берди.

Семинардын жүрүшүндө Ноокен РИИБдин жашы жете элек өспүрүмдөр менен иштөө инспекциясынын инспекторлору тарабынан даярдалган видеоролик көрсөтүлдү. Милиция кызматкерлери семинардын катышуучуларын кылмыштуулуктун, үй-бүлөлүк зордук-зомбулуктардын, диний экстремизмдин алдын алууда кайдыгер карабоого чакырышты. Коомдук тартиптин сакталуусуна, кылмыштуулукка бөгөт коюуда милиция менен тыгыз кызматташууга, туура эмес диний агымдарга кошулуп калуудан алыс болууга үндөштү. Ошондой эле жаш балдарды көзөмөлсүз калтырбоо керектигин эскертишти.

Семинар суроо-жооптор менен улантылып, катышуучулардын сунуштары кабыл алынды.