897 Бардыгы /

БАТКЕН. Баткенде чек арадагы кырдаалга байланыштуу болжол менен 11 миң 52 жергиликтүү тургун коопсуз жайларга эвакуацияланган. Булардын 10 миң 410у коопсуз аймактагы үйлөргө көчүрүлсө, а калган 642си адам убактылуу түзүлгөн бекеттерге жайгаштырылган эле.

Өзгөчө кырдаалдар министрлигинин басма сөз кызматы кабарлашынча, Баткен районунун Орто-Боз, Жака-Өрүк, Үч-Дөбө, Ак-Татыр, Самаркандек, Ак-Сай, Таш-Тумшук айылдарынын болжол менен 6 миңдей тургуну Рават айылына эвакуацияланган. Лейлек районунун Максат айылынан 400 адам Маргунга, Интернационал айылынын миңдей жараны Кайрагач айылындагы мечитке көчүрүлгөн. Мурза-Патча, Сада, Ак-Арык жана Раззаков айылындагы жергиликтүү жашоочулар Исфана, Сүлүктүгө эвакуацияланган. Самаркандек жана Ак-Татыр айылынын миңдей жашоочусу Лейлек, Кара-Суу, Ак-Теректеги мечит жана үйлөргө жайгаштырылган.

Ушул тапта эвакуацияланышкан жарандар дарыгерлердин туруктуу көзөмөлүндө болуп, алардын арасында түшүндүрүү иштери дагыле жүрүп жатат. ӨКМ убактылуу көчүрүлгөндөр бардык зарыл каражаттар менен камсыз этилгендигин кошумчалады.

Алишер ТОКСОНБАЕВ, өз кабарчы