696 Бардыгы /

“Медиа Полиси” институту Kaktus.media жана Temirov Live каналына жасалган басымга байланыштуу Кыргызстандагы көз карандысыз маалымат каражаттарын медиа мейкиндиктен кууп чыгуу аракети болуп жатканын билдирди.

Бул тууралуу институт бүгүн, 9-февралда жасаган кайрылуусунда жазган.

“Kaktus.media басылмасына каршы акциялар Кыргызстандагы көз карандысыз маалымат каражаттарын медиа мейкиндиктен жок кылууга коомду үндөө аракети болуп саналат. Бул тыянакты азыркы бийлик өзүнө карата айтылган сынга чыдабай, тескерисинче, сын айткандарга карата кылмыш ишин ачканынан улам чыгардык. Буга акыркы күндөрү Болот Темировго козголгон кылмыш ишин негиз келтирсек болот. Медиага эркиндик берүү – демократиялык коомдо атуулдардын укугунун эң негизги таянычы. Анын арты менен журналисттер коррупциянын бетин ачат, аткаминерлерге суроо берип, бийликти коомдун алдында отчеттуулукка чакырат”, – деген билдирүүдө.

Уюм өлкөдө журналисттер менен медиа уюмдардын укугу корголушу керектигин эскертип, ЖМКга жасалган кысымдарды тизмектеп берди.

Бийлик тараптан бул кайрылууга комментарий бериле элек.

9-февралда Kaktus.media басылмасынын алдында бир нече киши каршылык акциясына чыгып, анын жабылышын жана жоопко тартылышын талап кылышты. Ушундай акция 28-январда да өткөн.

27-январда Kaktus.media порталына кыргыз-тажик чек арасындагы соңку чырга байланыштуу Тажикстандын Asia Plus сайтынын куралдуу жаңжалда кыргыз тарап биринчи ок чыгарганы тууралуу маалыматы көчүрүп жарыяланган (перепечатка). Kaktus.media басылманын максаты – тажик тарап кандай маалыматтык саясат жүргүзүп жатканын кыргыз коомчулугуна көрсөтүү болгонун билдирген жана кетирилген ката үчүн кыргызстандыктардан кечирим сураган.

Бул окуяга байланыштуу Бишкектин Биринчи май райондук прокуратурасы Кылмыш-жаза кодексинин 407-беренеси (“Согушту пропагандалоо, башкача айтканда, бир өлкөнүн башка өлкөгө агрессиясын жаратуу же согуштук жаңжалды баштоо максатында көз караштарды, идеяларды же чакырыктарды ар кандай формада жайылтуу”) менен кылмыш ишин козгогон.

Баткенде 27-январда кыргыз-тажик чек арасында жаңжал чыккан. Тажик тургундар жолду бууганга аракет кылып, сүйлөшүүлөрдөн кийин абал тынчыган. Кыргызстан муну тажик чек арачыларынын атайын чагымы деп атаган, тажик тарап Кыргызстанды айыптаган.

Жаңжалда Кыргызстандан 12 адам жараат алган. Тажик тарап жаңжалда эки жаран мерт болуп, дагы 10 адам жараат алганын маалымдаган.

WWW.