993 Бардыгы /

Акыйкатчы институту менен Кыйноолордун алдын алуу боюнча улуттук борбордун делегациясы Казакстандагы кыргыз жарандарынын мыйзамдуу укуктарын жана кызыкчылыктарын коргоо үчүн коңшу өлкөгө барышты.

Акыйкатчы аппаратынан билдиришкендей, 9-февралда укук коргоочулар Алматы шаарынын прокурорунун орун басары Нурлан Ауганбаев менен жолугушту. Анын жүрүшүндө Ауганбаев Кыргызстандын жарандарына байланышкан укуктук маселелерди чечүүгө колдоо көрсөтүүгө даяр экенин билдирди. Мындан тышкары ал бүгүнкү күндө Алматыда камакка алынган кыргыз жарандары жок экенин белгилеп, Чолпонбек Сыдыков менен Викрам Рузахуновго байланыштуу кылмыш иштери козголуп, тергөө жүрүп жатканын кошумчалады.

Акыйкатчы институтунун маалыматына караганда, делегация мүчөлөрү 10-февралда Тараз шаарына барып, Казакстандын Адам укуктары боюнча ыйгарым укуктуу өкүлү Эльвира Азимова менен жолугушуу өткөрөт. Болжолдуу маалыматтарга ылайык, бул шаарда эки кыргызстандык камакта отурат.

Мындан тышкары сапардын алкагында укук коргоочулар Казакстандагы жабык жайлар менен социалдык жайларга барып, бул өлкөдө иштеп жүргөн кыргыз жарандары менен жолугушат.

Казакстандагы январь окуялары маалында 10го жакын кыргызстандык кармалып, кайра бошотулган. Алардын арасында белгилүү кыргыз музыканты Викрам Рузахунов менен Алматыда катуу сабалган Чолпонбек Сыдыков да болгон. Сыдыков Бишкекке жеткирилгенден кийин ага операция жасалып, дарыгерлер эки буту, кабыргалары сынып, мээси чайкалганын билдиришкен.

WWW.