1,410 Бардыгы /

ЖАЛАЛ-АБАД. Ноокен районунун Бирдик айылында жана Базар-Коргон районунун Могол-Коргон айылында милиция жергиликтүү тургундар менен жолугушту. Анда буга чейин орун алган жаш өспүрүмдөрдүн топтошуп мушташуусуна карата түшүндүрүү иштери жүргүзүлдү.

Жалал-Абад ОИИБдин басма сөз кызматы маалымдагандай, милиция кызматкерлери ата-энелерди балдарына татыктуу тарбия берүүгө жана жүрүм-турумуна ар дайым көзөмөл салууга чакырышты. Мектеп окуучуларынын лидердик маселесине бөгөт коюуда биргеликте кызматташуу зарылдыгы белгиленди. Коомдогу терс көрүнүштөрдүн алдын алууда кайдыгер карабастан милиция менен тыгыз байланышта болуу керектиги айтылды.

Ал эми мектеп окуучулары менен өзүнчө жыйындар өткөрүлүп, алар менен маектешүүлөр орун алды. Жаш өспүрүмдөргө кылмыштуулуктун арты жакшылык менен аяктабай тургандыгы эскертилип, өткөн окуядан сабак алуу зарылдыгы жеткирилди. Туура эмес көрүнүштөргө күбө болгон учурда ойлонбостон милицияга кабар берүүгө чакырышты.

Бул сыяктуу профилактикалык жумуштар аталган райондордун башка айылдарында дагы улантылды.