1,863 Бардыгы /

ЖАЛАЛ-АБАД. К.Ш. Токтомаматов атындагы Эл аралык университетте (ЭАУ. Жалал-Абад) “Орус тили жана маданияты Кыргызстанда: тарых жана азыркы учур, биргелешкен аракеттердин көйгөйлөрү жана келечеги” аттуу эл аралык илимий-практикалык конференция өткөрүлдү.

ЭАУнун кесиптик багыт берүү жана коомчулук менен байланыштар кызматынын маалыматына ылайык, аталган конференцияга 115 филология, педагогика, тарых, саясат таануу, маданият таануу, этнография боюнча илимпоз жана адис, о.э. бир катар уюм-мекемелердин, коомдук-маданий бирикмелердин, жергиликтүү башкаруу органдарынын өкүлдөрү катышкан, анын ичинде Россия Федерациясынын, Өзбекстан Республикасынын, Казакстан Республикасынын жана Кыргыз Республикасынын (КУУ, И. Арабаев атындагы КМУ, КММА, ЖАМУ, ЗЭАУ, ОшМУ, БатМУ, ЭАУ) жогорку окуу жайларынын жана илимий мекемелеринин өкүлдөрү. Катышкан уюм-мекемелерден өзгөчө Россия Илимдер Академиясынын, П.П. Семёнов-Тянь-Шанский атындагы Эл аралык гуманитардык университеттин (РФ, Санкт-Петербург ш.), Россиялык Илим жана маданият борборунун, Россиялык “Орус дүйнөсү” фондунун Ош шаарындагы Орус борборунун, “Евразиялык муун” фондунун, Кыргызстан элдеринин ассамблеясынын Жалал-Абад областындагы өкүлчүлүгүнүн, “Славян диаспорасы” Жалал-Абад областтык ассоциациясынын өкүлдөрүн белгилеп кетебиз. Аталган конференция Кыргызстанда жана КМШ өлкөлөрүндө орус тилин жана маданиятын окуп-үйрөнүүдө, жайылтууда бир топ салымын кошту десек болот. Конференциянын катышуучулары ЭАУ ректоратына, профессор-окутуучулар курамына конференцияны уюштургандыгы, жогорку деңгээлде өткөргөндүгү үчүн ыраазычылык билдиришти. ЭАУ ректораты да конференциянын катышуучуларына өз ыраазычылыгын билдирет!