1,176 Бардыгы /

МОСКВА. Орусиянын башкалаасы Москва шаарында биринчи жолу мигрант айымдардын укугун коргоого арналган «Энелер ынтымактын жарчысы» аттуу форуму өз ишин аяктады. Аялдарга карата зордук-зомбулукту болтурбоо, бул жосунга каршы  үзгүлтүксүз  күрөшүү боюнча иш чаралардын алкагында өткөн бул жыйын Кыргыз Диаспорасынын аялдар Кеңеши тарабынан уюштурулду.

Орусиядагы Кыргыз диаспорасынын аялдар Кеңешинин координатору Сонунбү Карабаеванын айтымында, форум  Кыргызстандан келишип, Орусия мамлекетинде эмгектенип жүрүшкөн кыргыз кыз-келиндеринин, эне- баланын  укугун коргоо, аларга ар тараптан колдоо көрсөтүү максатын гана көздөйт. Буга улай дал ушул багыттагы көйгөйлөрдү кеңири талкууулоо менен, орун алып жаткан олуттуу проблемаларды так аныктоо, аны шыр чечүү жаатында дароо чечимдерди кабыл алып, конкреттүү иш аракеттерди жүргүзөт.

Форумдун жүрүшүндө анын катышуучулары  бөтөн жерде эмгектенишип жүрүшкөн кыз-келиндердин арасында көйгөйлөр арбын экендиги баса айтышып, булардын алдын алуу, а түгүл таптакыр болтурбоо үчүн мигранттардан түзүлгөн  коомдорго туруктуу иш алып баруу жагы тапшырылды. Катышуучулар өзгөчө  жашы  жете элек  өспүрүм кыздарды миграцияга жалгыз жибербөө керектигин  катуу каңкуулашты. Ошондой эле социалдык иликтөөлөр боюнча Борбор Азия өлкөлөрү арасында  Кыргызстанда зордук-зомбулука дуушарланган кыз-келиндердин саны улам өсүп бараткандыгына дагы кабатырланышты.

Ал эми  Кыргыз Диаспора кеңещинин юристтери укуктук жактан ар тараптуу жардамга муктаж айымдардын баардык соболдоруна ынындыраарлык жооп кайтарышып, мигрант айымдардын арасында жаралган  көйгөйлөргө мындан ары дагы толук кандуу көмөк көрсөтүшөөрүн убадалашты. Кыргыз диаспора Кеңещинин төрагасы Кубанычбек Осмонов форумдун катышуучуларына кайрылып, ар кандай маанидеги жардамга муктаж болгон ар бир айымга тийиштүү жардамдар ыкчам көрсөтүлөөрүн, диаспоранын кеңсесинде юристтер акысыз жардам беришээрин дагы айтты.  Аны менен катар жумушка орноштурууга жана ишке, ошондой эле эмгек маянасына байланышкан көйгөйлөргө дагы жардам көрсөтүлөөрүн  катуу убадалады.

Алишер ТОКСОНБАЕВ, өз кабарчы