1,359 Бардыгы /

ОШ. Кыргыз Республикасынын Министрлер кабинетинин төрагасы Акылбек Жапаров Ош жана Баткен облустарына жасаган жумушчу сапарынын алкагында Ош облусунун Даңги тилкесинде кичи ГЭС куруу долбоору менен жеринде таанышты.

Ошентип, аталган аймакка кичи ГЭСтин курулушу менен Ош шаарынын бир бөлүгүн көп жылдардан бери чечилбей келген ичилүүчү таза суу менен толук кандуу камсыз кылуу маселеси дагы чечилмекчи. Кыргыз Өкмөтүнүн башчысы Акылбек Жапаров сунуш этилген бул болочоктуу долбоорду жактырып, ага тийешелүү бардык укуктук жана документациялык маселелерди ыкчам чечүү зарылдыгын баса белгиледи.

Сапарынын соңунда министрлер кабинетинин төрагасы Акылбек Жапаров аталган аймакка ирегелеш жайланышкан Кара-Суу районунун тургундары менен дагы жолугушуп, антикризистик чаралар, бюджеттик тармактын кызматкерлеринин эмгек акысын жогорулатуу, күн сайын керектелүүчү азык-түлүктөргө карата баалардын жогорулашына жол бербөө жана жер тилкелерин трансформациялоо боюнча Министрлер Кабинети тарабынан жүргүзүлүп жаткан иштер жөнүндө кеңири маалымат берди.

Алишер ТОКСОНБАЕВ, өз кабарчы