1,275 Бардыгы /

          БАТКЕН. Баткен облусуна караштуу “Кызыл-Бел”–“Гулистон” чек ара өткөрүү бекетинде Кыргыз Респубилкасынын Президентинин Баткен облусундагы ыйгарым укуктуу өкүлү Абдыкарим Алимбаев, Тажикстандын Согдий облусунун башчысы Раджаббой Ахмадзода, ошондой эле эки тараптын тиешелүү жетекчилери жана облустун күч түзүмдөрүнүн башчылары, Баткен жана Лейлек райондорунун акимдери чек арадагы акыркы кырдаалды талкуулашты.

Эки тараптуу жолугушуунун жүрүшүндө Кыргыз-Тажик чек арасындагы чыр-чатактарды алдын алуу, таптакыр болтурбоо жана чек аралаш аймактардагы соңку учурда орун алган окуялар жана аларды чечүү жолдору өз ара кызуу талкууланды. Сүйлөшүүнүн акырында чек арага жакын жайгашкан айылдардын сугат суу, жазгы талаа жана чарбачылык маселелери боюнча атайын эки облустун биринчи орун басарларынын жетектөөсүнүн астында суу чарба кызматкерлеринен турган комиссия түзүлдү. Аталган комиссия Лейлек районунун аймагында жолугушуп, өз жумуштарын баштамакчы.

Ал эми чек арага жакын жайланышкан айылдарда коомдук тартипти үзгүлтүксүз сактоо маселеси боюнча милиция кызматкерлери жана жергиликтүү бийлик тургундарга түшүндүрүү иш-чараларын байма-бай жүргүзүп, эки элдин ортосунда чагымчыл аракеттерди болтурбоо боюнча биргеликте кызмат өтөмөкчү. Ошондой эле чек арага жакын аймактарга кошумча күчтөрдү тартпоо боюнча дагы катуу макулдашылды.

Алишер ТОКСОНБАЕВ, өз кабарчы