936 Бардыгы /

“Кыргызнефтегаз” ААКтын 2021-жылдын 1-кварталынын жыйынтыгы менен 330 млн. сом таза киреше тапкан. 2022-жылдын биринчи үч айлыктын жыйынтыгы менен алдын ала эсептөөлөр боюнча 860 млн. сом таза киреше табууда. Бул көрсөткүч былтыркы жылдын 1-кварталына салыштырмалуу 530 млн. сомго көп.

Бул тууралуу “Кыргызнефтегаз” ААКтын жетекчиси Нургазы Нишанов 100 күндө аткарылган иштер тууралуу кенчилерге отчет берди.

 “173 миң тонна нефть алдык, көп жылдан бери мындай көрсөткүчтөр болгон эмес. Быйылкы 2022-жылга алдыга мындан дагы көп пландарга койгонбуз, 200 миңден ашыгыраак планды аткаралы деп аракет кылып жатабыз. Мамлекеттик  мүлк фонду койгон тапшырмаларды, бизге бекитип берген планды 8 миң тоннага ашыкча аткарып келатабыз. 2021-жылдын 1-кварталында 330 млн. сом таза киреше тапкан болсок, 2022-жылдын 1-кварталында 860 млн. сом таза киреше менен чыктык, бул деген 530 млн. сомго көбүрөөк болду. 1-кварталдын жыйынтыгы менен көрсөткүчтөр жакшы болсо айлык маяналарды 15%га көтөрөбүз деген убада берген элек, бирок мына кечээ мамлекеттик мүлк фондунун астында, Өкмөттүн, Жогорку Кеңештин астында отчёт берип, ушул ийгиликтерибизди уккандан кийин алар бизге 20%га айлыктарыбызды көтөргөнү уруксат берди. Кудай буйруса апрель айынан баштап 20% кошумча менен айлыктарды көтөрдүк. Бирок бул дагы чеги эмес, буйруса 2-кварталдын жыйынтыгы менен дагы да айлык акыларды көтөрөбүз, айтор жылдын аягына чейин минимум 40%га айлыктарды көтөрөбүз. Бул жетишкендиктер менин гана эмес, бардык ишкерлердин, жамааттын биримдикте иш алып баруусунан ушул ийгиликке жетип жатабыз. Жумушчуларга кандай гана шарт түзбөйлү, кандай гана техника же инновациялык техникаларды киргизбейли, биз азыр 500 миң тоннага жакынкы 3, 4 жылдын ичинде жетишүүбүз керек.

Дагы бир энергия коопсуздугу деген түшүнүк бар, тарых өзү көрсөттү, ковидге окшогон оорулар же кандай бир конфликттер болуп кеткен учурда көрүп атабыз чек аралар жабылып, баары өзү менен өзү болуп, эч кимге эч ким жардам бербей калган учурларды башыбыздан өткөрүп жатабыз. Ушундай чакырыктарга биз даяр болушубуз керек. Биздин мамлекетибиздин жылдык керектөөсү 1 млн.300 миң тонна, биз ошонун эч болбосо 40%ын өзүбүзгө милдеттенмеге алсак, мамлекетибизге чоң жардам берген болобуз. Биз мамлекеттик мүлк фондуна караштуубуз, дивиденд төлөп жүргөнбүз, буга чейин эң көп 213 млн. сом дивиденд берген экенбиз. Мына быйылкы жылы да биздин тапкан кирешебиздин дээрлик көп бөлүгүн 650 млн. сомду мамлекеттик бюджетке дивиденд катары берип берүүдөбүз. Ал эми 1,5 млрд. сомду биз өзүбүздүн өнүгүүгө КПКны модернизация кылалы деп жатабыз. Мына жылдын эсебинен дагы чоң пландарыбыз бар, 4 млрд. сомдон кем эмес таза кирешенин үстүнөн иштейбиз деп жатабыз, кудай буйруса ага да жетебиз”.