1,563 Бардыгы /

ЖАЛАЛ-АБАД. Тогуз-Торо РИИБдин көчмө кабылдама унаасы менен кызматкерлер Додомол, Кош-Булак айылдарына барышып, мектеп окуучулары менен жолугушту.

Жалал-Абад ОИИБдин басма сөз кызматынын маалыматына ылайык,аталган райондогу Додомол, Кош-Булак айылдарындагы окуучулар менен жолугушууда өспүрүмдөр арасында кылмыштуулуктун алдын алуу маселеси талкууланды.

Мындай жолугушуу Ала-Бука районундагы №11 Р.Кулуев орто мектебинде ата-энелер менен өткөрүлдү. Чогулушта укук бузууларга бөгөт коюуда ар бир жаран кайдыгер карабоо керектиги эскертилип, өспүрүмдөрдү көзөмөлгө алуу зарылдыгы айтылды. Мындан сырткары район аймагында жол кыймылынын жаш тескөөчүлөрүнүн сынагы өткөрүлдү. Ага 5 команда катышып, жыйынтыгында 1-орунду Балтагулов орто мектебинин окуучулары жеңип алышты.

Өспүрүмдөргө байланыштуу жыйын Майлуу-Суу ШИИБи тарабынан да уюштурулду. Жыйынга мэриянын, билим берүү жана балдарды коргоо бөлүмүнүн кызматкерлери, шаар имамы, жогорку класстардын окуучулары катышышты. Жаштарга диний экстремизм, кылмыштуулуктун терс жактары боюнча лекциялар окулуп, зордук-зомбулуктарга каршы түшүндүрүү иштери жүргүзүлдү.