2,757 Бардыгы /

Урматтуу мекендештер, Жалал-Абад облусунун тургундары жана коноктору, кадырлуу мусулман бир туугандар!

Баарыңыздарды жан дүйнөнү аруулантып, ынтымакты жана мээримдүүлүктү тартуулаган Орозо айынын аякташы жана Айт майрамыңыздар менен Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын жана жеке өзүмдүн атымдан чын дилимден куттуктайм!

Отуз күнгө созулган Рамазан бул – руханий тазаланууга, пейилди оңдоп, жакшылык жасоого умтулуу. Көңүлдөгү таарынычтарды кечирип, сабырдуулукка жана кайрымдуулукка чакыруу.

Биз бул айды жакшы тилек, жаркын үмүттөр менен күтөбүз. Таңдан-кечке тамактануудан баш тартуу менен гана чектелбей, мусулмандар ыйык айда ыйманын жаңылап, жан-дүйнөсүн аруулап алууга ашыгат. Бул майрам араздашкандар жарашып, бири-бирибизге белек берип, кадыр көңүл табыша турган күн.

Нечен кылымдап калыптанган Ислам динибиздеги мына ушул руханий дөөлөт адам баласын ар дайым алдыга, жакшылыкка жетелеп, жаш муунду туура жолго чакырып келет.

Кымбаттуу мекендештер!

Баарыңыздарды бүгүнкү Орозо Айт майрамыңыздар менен дагы бир ирет  куттуктайм!

Жараткан ар бир үй-бүлөгө, Мекенибизге жакшылык, кубаныч, ынтымак, биримдик жана молчулук берсин. Бир ай бою ыйык айда айтылган ниететтерибиз Жараткан кабыл болсун!

Алла Таалам элибизди, жергебизди ар кандай жамандыктан сактасын. Мекенибиз мындан ары да гүлдөп өнүгө берсин.

Мусулман баласынын жан дүйнөсүн тазартып, жакындардын ортосундагы урмат-сый жана бир туугандык сезимдерин, мээримдүүлүктү күчөтүп, ыймандын үлгүсүн көрсөтүүгө өбөлгө болгон ыйык Орозо Айт майрамыңыздар маарек болсун!  Баарыңыздар бекем ден соолукта болуп, үй-бүлөңүздөр менен бакубат өмүр сүрүңүздөр.     

Абсаттар СЫРГАБАЕВ,

Кыргыз Республикасынын Президентинин Жалал-Абад облусундагы ыйгарым укуктуу өкүлү