1,059 Бардыгы /

ЖАЛАЛ-АБАД. Бүгүн, 18-май күнү Жалал-Абад шаарынын мэри Эрнисбек Ормоков таң эрте жетекчилер менен шаардын Достук, Курманбек жана Спутник аймактык башкармалыктарын кыдырып, аткарылып жаткан иштердин сапатын текшерүүгө алды.

Жалал-Абад шаардык мэриясынын маалымат борбору билдиргендей, текшерүүнүн жыйынтыгы менен берилген тапшырмаларды убагында аткарбаган бир катар жетекчилерге эскертүү берилсе, айрымдарынын кызмат орду карала турганы белгилүү болду. Ошондой эле калаа башчысы коомчулуктун сынына кабылган көрктөндүрүү жана жашылдандыруу чарбасынын ишине өзгөчө көңүл буруп, социалдык тармактарда сынга кабылган, шаардын бир нече көчөсүнө тигилген туя көчөттөрүн жеринде текшерип, көрктөндүрүү жана жашылдандыруу чарбасынын жетекчисине куураган көчөттөр боюнча жоопкерчилигин эскертти. Ошондой эле бак-дарактарды бутоо, жол жээктериндеги өскөн чөптөрдү тазалоо боюнча да алгылыктуу иш жүрбөй жатканын белгилеп, кемчиликтерин жоюу боюнча тапшырма берилди. Ал эми аймактык башкармалыктардын башчыларына, жетекчилерге шаарды иретке келтирүү, курулуштарды сапаттуу бүткөрүү талабы коюлду.

Белгилей кетсек, эртең таң эрте шаар мэри жетекчилер менен шаарды жөө кыдырып чыгуусун улантат. Анын алкагында Ч. Айтматов жана Т.Тайгараев аймактык башкармалыктарында аткарылып жаткан иштер менен жеринде таанышат.