1,206 Бардыгы /

ЖАЛАЛ-АБАД. 1-июнь – Балдарды коргоонун эл аралык күнүнө байланыштуу иш-чара Ноокен районундагы Ж.Ниязов атындагы жалпы билим берүүчү көмөкчү мектебинде болуп өттү.

Жалал-Абад ОИИБдин басма сөз кызматы билдиргендей, ага Президенттин Жалал-Абад облусундагы ыйгарым укуктуу өкүлүнүн орун басары Эркинбек Маматаев, Ноокен РИИБдин начальниги Алтынбек Мусаев, ИИМдин “Унаа” мамлекеттик мекемесинин Ноокен секторунун жетекчиси Жумагүл Калыгулова катышты. Келген конокторго көмөкчү мектебинин тарбиялануучулары тарабынан тартылган сүрөттөр жана ички шарттары көргөзүлүп, концерттик программа менен коштолду.

Андан соң Ноокен РИИБдин начальниги Алтынбек Мусаев балдар күнүнө карата акчалай колдоо көрсөттү. Ал эми ИИМдин “Унаа” мамлекеттик мекемесинин Ноокен секторунун жетекчиси Жумагүл Калыгулова жаш балдарга алып келген белектерин тапшырды. Ошондой эле балдардын көңүлүн көтөрүү максатында жомок каармандарын ала келгендигин белгиледи.

Өз кезегинде Ж.Ниязов атындагы жалпы билим берүүчү көмөкчү мектебинин жетекчилиги колдоо көрсөткөндөргө ыраазычылык билдирип, буга чейин да бир канча ирет ар түрдүү материалдык жардамдарды берип келе жатышкандыгын айтып өттү.

Таш-Көмүр ШИИБдин начальниги Момунаалы Добулбеков жана Кара-Көл ШИИБдин начальниги Эрнист Молдокеев балдарды эл аралык күнү менен куттукташты. Ошондой эле өздүк курам тарабынан даярдалган белектер тапшырылды.